Ըստ ՀԱԿ քաղաքապետի թեկնածու Վահագն Խաչատրյանի՝ 6 տոկոսից ավելի պետք է լինեն իրենց ձայները, որ մանդատները վերցնեն:
Այսօր Դալմայի հողօգտագործողների հետ հանդիպումից առաջ պարոն Խաչատրյանը զրուցեց լրագրողների հետ ու անդրադարձավ, թե ավագանու նախորդ ընտրություններից ինչու հրաժարվեցին. «Անցյալ անգամվա քաղաքական իրավիճակը եւ հիմա էականորեն տարբերվում են: Անցյալ անգամ մեր գործունեությունը հիմնականում իրականացվեց փողոցում: Անցյալ անգամ մենք ունեինք քաղբանտարկյալներ եւ որեւէ համագործակցության չէինք գնա իշխանության հետ, մինչեւ վերջին քայլը, երբ ազատվեց վերջին քաղբանտարկյալը: Եվ մենք նստեցինք երկխոսության իշխանության ներկայացուցիչների հետ մինչեւ այն դեպքը, երբ նորից հայտնվեց քաղբանտարկյալ` հանձին Տիգրան Առաքելյանի»:
Հարցին, թե քանի մանդատ էլ լինի, կվերցնե՞ք, պարոն Խաչատրյանը պատասխանեց. «Շատ լավ հասկանում ենք, որ այսօր իշխանությանը հաղթելու հնարավորությունը, ռեալ եմ գնահատում, միայն ոչ իշխանական ուժերի հետ համագործակցության արդյունքում է լինելու»:
Հարցին, եթե քաղաքապետ չընտրվեք, ավագանու կազմում կաշխատե՞ք, պարոն Խաչատրյանն ասաց. «Մեծ ամբիցիաներ չունեմ: Ավելի շատ մտածում եմ, ոնց կարող եմ օգտակար լինել»:
Կարդացեք նաև
Ընտրախախտումների վերաբերյալ իշխանությունների տրամադրվածության մասին հարցին, պարոն Խաչատրյանն ասաց` տրամադրվածության հարցում ոչ մի փոփոխություն չի նկատում. «Շատ ավելի կազմակերպված ձեւով հիմա դա արվում է: Բոլոր լծակներն են օգտագործվում: Տեղեկություն ունեմ` ինչ է կատարվում տեղերում: Տեղեկություն ունեմ` ինչ ակտիվ մասնակցություն պետք է ունենան ուսուցիչները, առողջապահական հիմնարկի աշխատողները: Քաղաքային տնտեսության եւ պետական իշխանության բոլոր օղակները մասսայական զբաղված են իշխանության ներկայացուցիչների քարոզչությամբ, ցուցակագրելով, անձնագրային տվյալներ հավաքելով: Հետընտրական իրադարձությունները կապված կլինեն ինչքանով կարող ենք կազմակերպված աշխատել: Տեղերում այսօր ունենք 4 հանձնաժողովի անդամ, հնարավորություն ունենք ունենալու նաեւ վստահված անձինք»;
Նրա խոսքերով ոչ իշխանական ուժերի հետ պարտավոր են ընդհանուր լեզու գտնել ընտրական գործընթացների համատեղ վերահսկողություն իրականացնել, միմյանց օգնել , տեղեկություններ փոխանցել:
Անդրադառնալով Լեւոն Տեր-Պետրոսյանի հայտարարությանը, թե ՀԱԿ-ի ընտրազանգվածի մեծ մասը Ազատության հրապարակում է՝ Րաֆֆի Հովհաննիսյանի կողքին՝ պարոն Խաչատրյանն ասաց, որ այդ զանգվածը ե’ւ ՀԱԿ-ինն է, ե’ւ «Ժառանգությանը». «Րաֆֆի Հովհաննիսյանը հաղթել է ընտրություններում , շնորհիվ իշխանությունների նկատմամբ ժողովրդի մեծ դժգոհության: Ես այդ մարդկանց չեմ ուզում բաժանել: Չեմ ուզում ասել` այնտեղ գտնվող իմ ընկերը ինձ ձայն կտա՞, թե՞ չի տա: Իմ ընկերը պետք է որոշի: Մենք մեծ հնարավորություն ենք տվել մարդկանց, նկատի ունեմ` 4 ոչ իշխանական ուժերին, իրենց գաղափարական տեսակետից քվեարկեն իրենց ուզած մարդուն: Ամենակարեւորը ` իշխանության ներկայացուցիչները այս ընտրություններում չհաղթեն եւ չունենան համապատասխան ձայներ, որով կարողանան քաղաքապետ ընտրել եւ ավագանի ձեւավորել»:
Արփինե ՍԻՄՈՆՅԱՆ
