«Գոլդեն Թյուլիփ» հյուրանոցում այսօր Երևանյան միջազգային տանգո փառատոնի հիմնադիր Նիկա Բաբայանը խոսեց 2013 թվականի տանգո փառատոնի ծրագրում ներառված 8 համերգների մասին: Դրանցից չորսն արդեն տեղի է ունեցել երևանյան բուհերում, և փառատոնի օտարերկրացի հյուրերի` արգենտինացի հայտնի բանդոնեոնահար Վալտեր Ռիոսի և երգչուհի Մարիել Դյուպերի ելույթները «Կադանս» անսամբլի հետ տեղի կունենան ապրիլին` Գյումրիում և Երևանում: Փառատոնի 7-րդ համերգը նախատեսված է մայիսին` Վանաձորում, իսկ եզրափակիչ 8-րդ համերգը` հունիս-հուլիս ամիսներին: Եզրափակիչ համերգը հատկանշական է այն առումով, որ նախատեսվում է Աստոր Պյացոլլայի «Տարվա եղանակներ» հանրահայտ ստեղծագործության համաշխարհային շնորհանդեսը:
ՀՀ մշակույթի նախարարի տեղակալ Արթուր Պողոսյանն ասաց. «Սա մի փառատոն է, որ ժամանակագրական առումով դեռ երիտասարդ է, բայց հասցրել է սիրվել մեր հասարակության կողմից: 2010թ.-ին «Կադանս» անսամբլը փորձեց նմանատիպ նախաձեռնությամբ հանդես գալ և միանգամից այս նախաձեռնությունը «Միջազգային տանգո փառատոն» հիմնադրելու գաղափարը հանրության կողմից արժանացավ բավականին հետաքրքիր արձագանքի: Շատ կարևոր է նաև մեզ համար այն, որ փառատոնն ունի աշխարհագրական ընդգրկվածություն: Ոչ միայն Երևանում է տեղի ունենում, այլև Գյումրիում` «Վերածնունդ» միջազգային 5-րդ փառատոն-մրցույթի շրջանակներում: Տեղի կունենա նաև Վանաձորում: Սրանով մենք փորձում ենք ապահովել մարզի հանդիսատեսի ներգրավվածությունը այս փառատոնի շրջանակներում»:
Փառատոնի հիմնադիր տնօրեն Նիկա Բաբայանը նշեց, որ հայ մտավորականների ընտանիքից սերող Արթուր Դերոյանի հիմնական աջակցության շնորհիվ է, որ նրանք կարողացել են Արգենտինայից Հայաստան հրավիրել ամենահետաքրքիր, ամենահեղինակավոր երաժիշտներից երկուսին:
Տանգո երգչուհի Մարիել Դյուպետին ասաց. «Սա շատ լավ հնարավորություն է, որ երկու երկրներ ճանաչեն միմյանց: Երկուսն էլ շատ գեղեցիկ են, լի են գեղեցիկ մարդկանցով և հատկապես շատ հիանալի է զգալ երաժշտական նմանությունը, որ կա այդ երկու երկրների միջև: Սա ստեղծում է մի ռոմանս, որն էլ վերջում համալրում է երկու ազգերին»:
Կարդացեք նաև
Չցանկանալով բացել փակագծերը` փառատոնի հիմնադիրը նշեց, որ արգենտինացի երգչուհին կատարելու է մեկ հայկական տանգո: Իսկ երգչուհին հավելեց. «Քանի որ առաջին անգամ եմ Հայաստան գալիս, ես կարծում է, որ խոսելու, իրար հասկանալու միակ միջոցը դա երաժշտությունն է»: Ամեն անգամ ինչ-որ երկիր այցելելիս նա ցանկանում է մի փոքրիկ ճանաչել և մոտենալ այդ երկրի մշակույթին: Ուստի միակ ձևը, որով նա կարող է ինչ-որ չափով մոտենալ մշակույթին և իր շնորհակալությունը հայտնել այդ մշակույթը կրող ժողովրդին` դա երաժշտությունն է: Նա ցանկացավ նախապես ճանաչել և սովորել:
Արգենտինացի բանդոնեոնահար, կոմպոզիտոր, գործիքավորող, դիրիժոր Վալտեր Ռիոսը խոստովանեց, որ նախկինում չի ճանաչել այս երկիրը: Ճանաչել է շատ այլ հարևան երկրներ, բայց ոչ Հայաստանը. «Շատ ուրախ եմ, որ Հայաստանում եմ և շատ սիրեցի»:
Արմինե ՀԱՄԲԱՐՁՈՒՄՅԱՆ
