Գագիկ Հարությունյանը` Հայաստան-Վրաստան հարաբերությունների մասին
«Տարածաշրջանային գործընթացներում կան հուսադրող միտումներ»,-այսօր «Փաստարկ» ակումբում ասաց «Նորավանք» գիտակրթական հիմնադրամի տնօրեն Գագիկ Հարությունյանը` մասնավորեցնելով, որ վերջին երեք ամսում, օրինակ, կարեւոր հանդիպումներ եղան հարեւան Վրաստանի պաշտոնյաների հետ. «Դա արտակարգ դիվանագիտական ակտ է: Վրաստանում վերանայում են «ազգային շահ» հասկացությունը, որը բավական համընկնում է մեր շահի հետ: Վերանայվում են նաեւ Թուրքիայի եւ Ադրբեջանի նկատմամբ մոտեցումները: Կարծես ձեւավորվում է մոտեցում, որ Վրաստանը կարող է ավելի չեզոք դիրք գրավել ԼՂՀ հակամարտության լուսաբանման խնդիրներում: Բացի այդ, Մայա Փանջիկիձեի այցի ժամանակ հնչեց կարեւոր` «ընդհանուր շուկա» հասկացողությունը: Վրաստանը եւ Հայաստանը տնտեսական խնդիրներ ունեն, իսկ որոշ տնտեսություններ չեն կարող մեծ ծավալներով զարգացում ապրել: Ծավալների մեծացման համար կարեւոր է Վրաստանի հետ ինտեգրումը»:
Բանախոսի համոզմամբ. «Փորձեր պետք է կատարվեն նաեւ ինֆորմացիոն դաշտի ինտեգրման ուղղությամբ, որպեսզի երկու երկրները տեղեկանան կատարվող իրադարձությունների մասին: Անհրաժեշտ է ստեղծել ընդհանուր տեղեկատվական, արդյունաբերական եւ մշակութային տարածք: Այս ամենը էապես կփոխի իրավիճակը տարածաշրջանում»:
Պարոն Հարությունյանի դիտարկմամբ. «Մենք շատ վատ գիտենք Վրաստանը, իսկ պատկերացումները բավարարվում են, ասենք, Ջավախքի խնդիրներով, սակայն տեղեկացվածության խնդիրը նաեւ Վրաստանին է վերաբերում»:
Կարդացեք նաև
«Նորավանքի» տնօրենի խոսքով` համատեղ ակցիաները, օրինակ, Հայաստան-Վրաստան համատեղ հեռուստակայանի ստեղծումը, կմեղմեն երկու երկրների միջեւ լարվածությունը:
Լուիզա ՍՈՒՔԻԱՍՅԱՆ
