«Ուֆայի» եւ ֆուտբոլի Հայաստանի ազգային հավաքականի անդամը չի բացառում, որ իրեն որակազրկելու որոշումը կարող է կապված լինել նաեւ դրա հետ:
Ռուսաստանի ֆուտբոլային միության կարգապահական հանձնաժողովը 23-րդ տուրում «Սիբիրի» դարպասապահ Տրունինի հետ բախվելու համար, որի ժամանակ վերջինն ուղեղի ցնցում եւ դիմոսկրի կոտրվածք էր ստացել, Մարկոսովին որակազրկել է վեց խաղով: Սակայն Մարկոսովն էլ չէր խուսափել վնասվածքներից՝ նույնպես ուղեղի ցնցում եւ քթի կոտրվածք: «Ես արդեն 100 անգամ ասել եմ, որ բախման ժամանակ չեմ նկատել Տրունինին: Ինձ էլ են բախվել: Դա պարզ երեւում է ստոպ-կադրում եւ դա ընդունում են ԶԼՄ-ներն ու շահագրգիռ կողմերը: Բացատրություն չկա: Ես չեմ ցանկանում, որ ինձ խառնեն անդրկուլիսային գործերի մեջ: Այնպիսի տպավորություն է, թե կամ խփում են ակումբին, կամ ես ինչ որ բան եմ արել, որն ինչ որ մեկին դուր չի եկել: Եթե այս ամենը կապված է այն բանի հետ, որ համաձայնել եմ հանդես գալ Հայաստանի հավաքականի կազմում, ապա ինչո՞ւ պիտի հրաժարվեի: Ազգային հավաքականից հրավեր ստանալը յուրաքանչյուր ֆուտբոլիստի երազանքն է: Չնայած, ես ծնվել եմ Ռուսաստանում, իմ ընտանիքի արմատները Հայաստանում են: Մի՞թե դրա համար պետք է պատժել», – հայտարարել է Մարկոսովը:
Աշոտ ՀԱԿՈԲՅԱՆ
