ՀՀ Ազգային վիճակագրական ծառայության տվյալների համաձայն, այս տարվա հունվար-փետրվար ամիսներին Հայաստանից հեռացածների թիվը Հայաստան ժամանածների թվից ավելի է 22,1 հազարով։ Նախորդ տարվա նույն ժամանակահատվածի համեմատ այս թիվն ավելացել է 53,7 տոկոսով։
«ՉԻ» – Փաստորեն՝ ընդամենը մեկ տարվա ընթացքում արտագաղթի տեմպերն աճել են 53,7 տոկոսով։ Իշխանություններն, իհարկե, հիմա կսկսեն արդարանալ, թե միշտ էլ հունվար– փետրվարին մեկնողները շատ են լինում, որովհետեւ «խոպանչիները» վերադառնում են Ռուսաստան, բայց հիշեցնենք, որ 53,7 տոկոսանոց աճն արձանագրվել է նախորդ տարվա հունվար-փետրվարի համեմատ, այսինքն՝ անցած տարի էլ էին հունվար-փետրվարին հեռանում, բայց տեմպերը կատաստրոֆիկ աճել են։
Կարելի է չկասկածել, որ այս տվյալների հրապարակումից հետո Տիգրան Սարգսյանը կվերանշանակվի վարչապետի պաշտոնում։ Մարդը փաստորեն 53,7 տոկոսով ակտիվացրել է պայքարը հեղափոխական գործընթացների դեմ եւ միաժամանակ մեծացրել է դրսից Հայաստան ուղարկվող մասնավոր տրանսֆերտների հետագա աճի հնարավորությունը։ Մնում է՝ կարողանա շատից-քչից հոդաբաշխ բացատրություն տա, թե ինչպե՞ս է պատահում, որ նույն երկրում միաժամանակ ե՛ւ տնտեսությունն է աճում, ե՛ւ արտագաղթը։
«Չորրորդ ինքնիշխանություն»
Կարդացեք նաև
Կարևորը թղթի վրա ամեն ինչ լավ լինի: