Իշխանությունները հայտնաբերել են չգործած պայթուցիկ ևս երեք սարք, որոնցից մեկը հայտնաբերվել էր Բոստոնի Նյութն արվարձանում
Բոստոնի մարաթոնի ֆինիշային գծի մոտ երկուշաբթի օրը գրեթե միաժամանակ տեղի է ունեցել երկու ուժգին պայթյուն, որի հետևանքով զոհվել է երեք, վնասվածքներ ստացել ավելի քան 100 մարդ:
Հետաքննության անցկացման մանրամասներից տեղյակ աղբյուրներից մեկի համաձայն, իշխանությունները հայտնաբերել են չգործած պայթուցիկ ևս երեք սարք, որոնցից մեկը հայտնաբերվել էր Բոստոնի Նյութն արվարձանում:
Դեռևս որևէ հաղորդագրություն չկա հարձակման դրդապատճառների կամ հարձակումն իրականացրածների մասին: Իշխանությունների համաձայն, իրականացված հարձակումների համար որևէ մեկը դեռևս պատասխանատվություն չի ստանձնել:
Կարդացեք նաև
Չնայած ԱՄՆ-ի նախագահ Օբաման իր խոսքում տեղի ունեցածը հարձակում չի որակել, սակայն ԱՄՆ-ի Սպիտակ տան պաշտոնյաների համաձայն, բազմաթիվ պայթուցիկ սարքեր ներառող ցանկացած իրադարձություն «հստակ վկայում է ահաբեկչական գործողության մասին, և դրան վերաբերվելու են ահաբեկչական գործողության նման»:
Պայթյունները տեղի են ունեցել այն բանից հետո, երբ մարաթոնի 27 հազար մասնակիցներից մոտ 17 հազարն արդեն իսկ հատել էին ֆինիշային գիծը: Ոստիկանության աշխատողները պայթյուններից հետո թույլ չեն տվել մարաթոնի մասնակիցներին վերադառնալ մրցավազքի անցկացման վայր: Դադարեցվել է նաև դեպքի վայրը սպասարկող մետրոյի գծի աշխատանքը:
Բոստոնի մարաթոնի դեպքի վայր ժամանած փրկարար ծառայությունների աշխատողները արյունով պատված փողոցներից շտապում էին տեղափոխել վերջույթների վնասվածքներ ստացած տուժածներին մոտակայքում պատրաստված շարժական հիվանդանոց: Հիվանդանոցը պատրաստվել էր ավելի վաղ՝ մարաթոնի ուժաթափ եղած մասնակիցներին օգնություն տրամադրելու համար:
Պայթյունների հետևանքով ԱՄՆ-ի ավիացիայի դաշնային վարչությունը ժամանակավորապես արգելել է զույգ պայթյունների վայրի վրայով թռիչքների անցկացումը: Արգելքը սակայն չէր վերաբերվում Բոստոնի «Լոգան» օդանավակայանից իրականացվող թռիչքներին:
Բոստոնի դեպքերից հետո աշխարհի բազմաթիվ քաղաքներում խստացվել են անվտանգության միջոցները: Մեծ Բրիտանիայի ոստիկանությունը հայտնել է կիրակի օրը կայանալիք Լոնդոնի մարաթոնի անվտանգության ծրագրերը վերանայելու մասին, քանի որ Լոնդոնը չափազանց կարևոր թիրախ է համարվում ահաբեկիչների կողմից:
Նյու Յորքի ոստիկանության խոսնակը հայտնել , որ Բոստոնում տեղի ունեցած պայթյուններից հետո քաղաքի Մանհաթան թաղամասում ուժեղացվել է նշանակալից վայրերի, ներառյալ հայտնի հյուրանոցների, հսկողությունը:
Անվտանգության լրացուցիչ միջոցներ են ձեռնարկվել նաև ԱՄՆ-ի մայրաքաղաք Վաշինգտոնում և Լոս Անջելես քաղաքում:
ԱՄՆ-ի նախագահ Բարաք Օբաման հեռախոսազրույց է ունեցել Բոստոնի քաղաքապետ Թեմ Մենիննոյի և Մասաչուսեթսի նահանգապետ Դեվալ Պատրիկի հետ, որոնց ընթացքում խոստացել է ամեն տեսակի օգնություն տրամադրել հարձակման փաստով անցկացված հետաքննության ընթացքում:
Բոստոն քաղաքը ԱՄՆ-ի հյուսիս-արևելքում գտնվող խոշորագույն քաղաքներից է, որտեղ ամեն տարի անցկացվող մարաթոնը քաղաքի նշանակալի միջոցառումներից մեկն է: Ամենամյա մարաթոնին մասնակցելու համար քաղաք են ժամանում բազմաթիվ հյուրեր:
Տեսանյութ՝ պայթյուններից մեկի մասին
Արմեն Հովհաննիսյան
«Ամերիկայի Ձայն»
