Ըստ ճարտարապետ Սարհատ Պետրոսյանի` գաղափար ներկայացնողը ճարտարապետությունից տեղյակ չէ:
«ՓիԱր-ի զարգացման հայկական կենտրոնի»` Հանրապետության հրապարակում «Ազգերի տոհմածառ» տեղադրելու նոր նախագիծ-առաջարկը, ըստ ճարտարապետ, քաղաքաշինարար Սարհատ Պետրոսյանի, «լրիվ Հյուսիսային պողոտային համարժեք «լուծում» է»։
«Այս գաղափարը ներկայացնողը ոչ միայն ճարտարապետությունից տեղյակ չէ, այլև առհասարակ համաչափությունից տեղյակ չէ,- «Մեդիալաբին» ասում Պետրոսյանը:-12 մետր բարձրությամբ ծառը Photoshop անելիս դարձել է մոտ 40 մետր։ Բայց, դե, ճարտարապետական խնդիրները մեր օրերում այնպիսի մակարդակով են կատարվում, որ յուրաքանչյուր անձ, ով սվաղ անել կամ Photoshop գիտի, դառնում է ճարտարապետ։ Լրիվ Հյուսիսային պողոտային համարժեք «լուծում» է»։
Տեղեկացնենք, որ այսօր «ՓիԱր-ի զարգացման հայկական կենտրոն» հանրային կապերի հասարակական կազմակերպությունը «Ֆեյսբուք» սոցիալական ցանցում առաջարկել է հրապարակում տեղադրել «Ազգերի տոհմածառ»: Տոհմածառը պետք է ցույց տա, որ «աշխարհի բոլոր ազգերը սերում են Հայաստանից և հայերից»:
«Դեռևս 2004 թվականին հայտարարվել էր մրցույթ, որի նպատակն էր լուծումներ գտնել Լենինի արձանի տեղում առաջացած բաց տարածության համար: Մրցույթի արդյունքում, սակայն, որևէ նախագիծ չհաղթեց: Ազգերի «տոհմածառ» ներկայացնող այս նկարը մեզ է հասել 1634 թվականին Լոնդոնում տպագրված Ավետարանից: Այս բացառիկ «տոհմածառում» Հայաստանը ներկայացված է որպես մարդկության բնօրրան: Ծառի հիմքում տապանն է, որը կանգնած է Մեծ Մասիսի գագաթին, վերջինիս վրա կա գրություն` Armenia և Ararat»,- նշված է կենտրոնի հայտարարության մեջ:
«ՓիԱր-ի զարգացման հայկական կենտրոնը» նաև տեղեկացնում է, որ մոտ «12 մետր բարձրությամբ ծառն իր տեսքով լիովին համապատասխանում է թամանյանական ոճին և ներդաշնակորեն լրացնում է այն»:
«Բացի ծառի խորհրդանշական մեծ նշանակությունից, այն նաև տուրիստական, գիտակրթական և մշակութային մեծ արժեք ունի: Ծառի հիմքում տեղակայված տապանն ունենալու է պատուհան-անցքեր, որոնցից ներս բոլոր ցանկացողները կարող են խորհրդանշական մետաղադրամներ գցել: Դա հանդիսանալու է յուրօրինակ «Ազգերի օգնության ֆոնդ», որում կուտակված գումարը ամեն տարի հատկացվելու է որևէ այլ ազգի` օգնություն ցուցաբերելու համար: Ծառի մոտ լինելու են հատուկ մետաղյա ցուցանակներ, որոնց վրա աշխարհի բոլոր հիմնական լեզուներով գրվելու է հակիրճ տեղեկատվություն ծառի և նրա նշանակության մասին: Նախագծի իրականացումը կապված չէ չափազանց մեծ ծախսերի հետ և կարող է իրականություն դառնալ ինչպես պետական միջոցներով, այնպես էլ հետաքրքրված անհատների կամ կազմակերպությունների ֆինանսավորմամբ»,- նշված է հայտարարության մեջ:
Մանրամասները կարդացեք այստեղ:
Շատ խելացի դիտարկում էր
Երբ պիտի վերջանա քաղաքը գյուղի ակումբային մակարդակով “զարդարելու” էս շղթան ???
Սրա փոխարեն մի մեծ եղևնի տնկեք, որ ամեն անգամ պետբյուջեից գումարներ կգողանաք հրապարակի կենտրոնի եղևնու հավաքման համար: Բացի այդ հրապարակի այդ հատվածում ապահով կլինի կազմակերպել երեխաների համար նախատեսված միջոցառումներ: Հաճախ եմ ականատես եղել, թե ինչպես են ծնողները երեխաների ձեռքը բռնած `վտանգելով իրենց ու վարորդների կյանքը, հատում հրապարակը, որ մոտենան եղևնուն: