Բարձր տեխնոլոգիաների ոլորտում կատարվող հանցագործությունները` ՀՀ ոստիկանության բարձր տեխնոլոգիաների ոլորտում կատարվող հանցագործությունների դեմ պայքարի բաժնի ավագ մասնագետ Անդրեյ Յաշչյանի համոզմամբ, յուրահատուկ բնույթ են կրում:
«Այդ բնույթի հանցագործությունները հիմնականում կրում են միջսահմանային բնույթ, այսինքն` հանցագործությունը կարող է սկսվել Հայաստանի տարածքում ու ավարտվել Ճապոնիայում: Հիշյալ հանցագործությունների դեմ պայքարում արդյունավետության առաջնային գործոններից մեկը հանդիսանում է միջազգային համագործակցությունը»,- այսօր լրագրողների հետ հանդիպման ժամանակ ասաց ոստիկանության պաշտոնյան` ընգծելով, որ հանցատեսակները օրեցօր ավելանում են, իսկ օրենսդրական դաշտը պետք է անընդհատ բարեփոխվի:
«2012 թվականի ընթացքում բաժնի կողմից իրացվել է շուրջ 40 քրեական գործ, իսկ ներկա պահին արդեն կա 22 քրեական գործ: Հանցագործությունները տարաբնույթ են, խոցելիության օբյեկտները` նույնպես»,- նշեց Անդրեյ Յաշչյանը ու հավելեց, որ հանցագործությունների բնույթը նույնպես տարբեր է` սկսած սոցիալական ցանցերի գաղտնաբառերի յուրացումից, մինչեւ լուրջ համակարգչային խարդախություններից:
Aravot.am-ի այն հարցին, թե արդյոք տվյալ ոլորտում կա պատրաստված ոստիկան-մասնագետների պակաս, պատասխանեց. «Ոլորտն անընդհատ զարգանում է, եւ ինչքան էլ լավ մասնագետներ ունենանք, միշտ էլ լավ մասնագետների պակաս կա: Վերապատրաստման կարիք միշտ կա: Հանցատեսակների զարգանալուն զուգընթաց` զարգանում ենք նաեւ մենք»:
Աշոտ ԱԹԱՅԱՆ
