Ստյոպա Սաֆարյանը նախարարին հիշեցնում է Աստծո պատվիրանները՝ մի դատիր, որ չդատվես
Անդրադառնալով «Ժառանգության» փոխնախագահ Արմեն Մարտիրոսյանի հետ կատարված միջադեպին՝ արդարադատության նախարար Հրայր Թովմասյանն ասել էր՝ «Ցավում եմ, որ հմուտ քաղաքական գործչի հետ նման բան է կատարվում: Բայց այն, ինչ որ պարոն Մարտիրոսյանն էր անում, այն ինչը որ տեսել եմ եւ հետեւել եմ, դա վայել չէ քաղաքական գործչին»:
Այս առնչությամբ «Ժառանգություն» կուսակցության գլխավոր քարտուղար Ստյոպա Սաֆարյանը, Aravot.am-ի հետ զրույցում պատասխանեց Հրայր Թովմասյանին. «Եթե հարգարժան նախարարը ինքը տարիներ շարունակ լռության է մատնել եւ ամենաաղաղակող տեսագրված հանցագործությունների մասին գնահատական չի տվել՝ պատճառաբանելով, թե ինքը դատական իշխանության անկախությունը չի կարող վտանգել, դատարաններն են որոշում եւ նման լուռ հուշարձանի կեցվածք է ընդունել, ապա բարի պետք է լինի նաեւ քաղաքական գործիչներին գնահատականեր չտա եւ շարունակի պահպանել լուռ հուշարձանի իր վատագույն ավանդույթները»:
Պարոն Սաֆարյանն ընդգծեց, որ նախարարը նաեւ ցավ է հայտնել Արմեն Մարտիրոսյանի նման լուրջ քաղաքական գործչի հետ կատարվածի հետ կապված. «Բայց եթե դրա հետ միասին նա տալիս է գնահատական քաղաքական գործչին ոչ վայել պահվածքի վերաբերյալ, ապա ճիշտ կլինի ամեն մեկը գնահատական տա իր պահվածքին, իր լռությանը եւ ընդհանրապես իր խոսքերին, որոնք հասարակության սեփականությունն են դարձել այս տարիների ընթացքում՝ ամենատարբեր միջադեպերի հետ կապված ՝ դա կլիներ բերան կարելու, թե այլ իրադարձություններ: Բոլոր դեպքերում ամեն մեկը պիտի պատասխան տա եւ դատի իր վարքագիծը, ոչ թե ուրիշներինը: Աստվածաշունչը եւ պատվիրաններն ասում են՝ մի դատիր, որ չդատվես»:
Կարդացեք նաև
Հռիփսիմե ՋԵԲԵՋՅԱՆ
<>: Առավել դիպուկ հնարավոր չէր նկարագրել այս նախարարին