ԱԺ ՀԱԿ պատգամավոր Լեւոն Զուրաբյանը պարբերաբար կրկնում էր, որ ՀԱԿ-ը այնտեղ է, որտեղ ժողովուրդն է: Այսօր պարոն Զուրաբյանից հետաքրքրվեցինք՝ ո՞ւր էին ապրիլի 9-ի ոստիկանների հետ բախումների ժամանակ:
«Երեւանում, լավ, լավ անիմաստ գնահատականներ են, որոնց մեջ չեմ ցանկանում մտնել»,- Aravot.am-ին ասաց պարոն Զուրաբյանն ու հեռացավ:
Նա նաեւ չցանկացավ խոսել Րաֆֆի Հովհաննիսյանի մոսկովյան այցի մասին. «Երբվանի՞ց եմ դարձել նրա խոսնակը: Հարցեր կան, որոնց մասին իմ կարծիքը նպատակահարմար չեմ համարում հրապարակել: Այս երկրում ունենք քննադատության մի թիրախ՝ իշխանությունները, թույլ տվեք քննադատել միայն նրանց: Չեմ կարծում, որ իմ գործն է գնահատել տարբեր քաղաքական գործիչների գործը»:
Պարոն Զուրաբյանը նաեւ հիշեցրեց ՝ պատրաստ են ընդդիմադիր քաղաքական ուժերի հետ միասնաբար պայքարել այս իշխանությունների դեմ ավագանու ընտրություններում: Նա նաեւ նշեց, որ հանդիպում են, բանակցում: Իսկ համագործակցության արդյունքները վստահեցրեց կերեւան առաջիկայում՝ թե ընտրություններից առաջ, թե ընթացքում եւ թե հետո:
Կարդացեք նաև
Լրագրողներից մեկի հարցին, թե ապրիլի 9-ի իրադարձություններն ինչպես են ազդելու ավագանու ընտրությունների վրա, պարոն Զուրաբյանն ասաց. «Մենք մեր գործն ենք անում, ունենք հստակ ծրագրեր, նպատակներ, հստակ քայլեր ենք նախանշել եւ գիտենք՝ ինչ է պետք անել, որ երկրում ստեղծված իրավիճակում փոխենք իրավիճակը, ժողովրդին տանենք հաղթանակ: Թե որ քաղաքական ուժը ինչով է զբաղված լինելու այդ ընացքում, դա արդեն նրանց պետք է հարցնեք: Ձախողելու են, տապալելու են դա իրենց գործն է»:
Պարոն Զուրաբյանից հետաքրքրվեցինք, ապրիլի 9-ին Րաֆֆի Հովհաննիսյանի քայլերը ՀԱԿ տարբեր անդամների կողմից քննադատվեցին, իսկ ինչպե՞ս էր վարվելու ՀԱԿ-ը, եթե շարժման առաջնորդը լիներ, կտանե՞ր Բաղրամյան 26, ասաց. «Եկեք եթեներ չքննարկենք: Ես ոչ մեկի չեմ քննադատել: Իմ թիրախը միշտ եղել ու մնալու է իշխանությունները: Մեր պայքարը ժողովրդի պայքարն է ժողովրդավարության հաստատման համար»:
Արփինե ՍԻՄՈՆՅԱՆ
