«Թե ինչ կարեւոր է ՀԱԿ կուսակցության ստեղծումը, դրա մասին չեմ խոսելու: Ուզում եմ խոսել ՀԱԿ-ին վերաբերող այն ասպեկտի մասին, դաշինքի մասին, որը ունեցավ 5 տարվա կյանք: Ուզում եմ գնահատել մեր 5 տարվա աշխատանքը: ՀԱԿ կուսակցության աշխատանքը սկսվելու է վաղվանից, մինչեւ այսօր ՀԱԿ դաշինքն էր, որը գուցե Հայաստանի պատմության ամենաբացառիկ միավորումն էր, որտեղ ընդգրկված էին 18 կուսակցություններ եւ կազմակերպություններ: Անկախ այն բանից, թե հետագայում այդ դաշինքի անդամներից ոմանք ինչ վարք, գործունեություն դրսեւորեցին, դա չի նսեմացնում նրանց գործը, որ արել են այս 5 տարիների ընթացքում…խորին շնորհակալություն եմ հայտնում Դաշինքի բոլոր անդամներին, որոնք կատարել են իրենց մեծագույն գործը: Հետագայում որոշ մարդկանց ճամփաները բաժանվել են, ոչինչ՝ դա չի նսեմացնում այն մեծագույն նպաստը, որ բերել են»,- այսօր ՀԱԿ հիմնադիր համագումարի ժամանակ ասաց ՀՀ առաջին նախագահ Լեւոն Տեր-Պետրոսյանը:
Անդրադառնալով ՀԱԿ դաշինքին մաս կազմող ու այժմ ՀԱԿ-ից հեռացած քաղաքական ուժերին, պարոն Տեր-Պետրոսյանն ասաց. «Բոլորին մաղթում ենք բարի ճանապարհ եւ հաջողություններ… Ասում ենք նորաստեղծ կուսակցություն, դա նորաստեղծ է միայն գրանցման առումով ու համագումարի կողմից հռչակվելու առումով: ՀԱԿ կուսակցության հռչակումը կատարված փաստի եւ 5 տարի առաջ կայացած իրողության ֆորմալ արձանագրումն է, ուրիշ ոչինչ»:
Արփինե ՍԻՄՈՆՅԱՆ
