Ամբաստանյալները դատարանից պահանջեցին արդարացնել իրենց:
Լեյտենանտ Արտակ Նազարյանի մահվան գործով դատավարության ապրիլի 12-ի նիստում ծավալուն՝ 37 էջից բաղկացած ճառով հանդես եկան քրեական գործով գլխավոր ամբաստանյալ, գումարտակի հրամանատարի տեղակալ, կապիտան Հակոբ Մանուկյանի պաշտպաններ Հրանտ Գեւորգյանը եւ Արմինե Ղասաբօղլյանը:
Նրանք մանրամասն անդրադարձան նախաքննության եւ դատաքննության ընթացքում կատարված խախտումներին: Պաշտպանները հայտարարեցին, որ մեղադրողի ճառը՝ բովանդակային և ապացուցողական մասով, հիմնականում արտագրված էր մեղադրական եզրակացությունից, այն սահմանափակ էր և չէր բխում գործի ամբողջ տվյալներից:
Կարդացեք նաև
Նրանց խոսքով ՝տպավորություն ստեղծվեց, որ դատական քննության ընթացքում նոր ապացույցներ կամ նոր հանգամանքներ ի հայտ չեն եկել, 1 տարի 8 ամիս տևող դատական քննությունը ժամանակի անիմաստ վատնում էր:
Պաշտպաններն ասացին, որ եթե քրեական գործը քննվեր ամբողջ ծավալով, առաջ քաշվեին և քննության առարկա դարձվեին գործից բխող բոլոր վարկածները, ապա քրեական գործն անկասկած կունենար այլ ելք: Նրանք հայտարարեցին, որ Հ. Մանուկյանին ՀՀ քրեական օրենսգրքի 360 և 365 հոդվածներով ինչպես նաև 375 հոդվածի 2-րդ մասով մեղսագրված հանցանքը բավարար ապացույցներով հաստատված չէ, չի բխում գործով ձեռք բերված ապացուցներից, պետք է կայացվի արդարացնող դատավճիռ, Մանուկյանի նկատմամբ պատիժ պետք է նշանակվի ՀՀ քրեական օրենսգրքի 375 հոդվածի 1-ին մասով նախատեսված հանցագործության կատարման համար` կապված 2010թ. հուլիսի 19-ին Ա. Նազարյանի հետ տեղի ունեցած միջադեպի հետ:
Պաշտպանների խոսքով՝ եթե դատարանը այնուամենայնիվ հաստատված կհամարի Մանուկյանին մեղսագրված, քրեական օրենսգրքի 360 և 365 հոդվածներով նախատեսված արարքը, այդ դեպքում դատարանը պետք է կիրառի համաներում հայտարարելու մասին ՀՀ Ազգային ժողովի 2011թ. մայիսի 20-ի որոշումը և կարճի ՀՀ քրեական օրենսգրքի 360 և 365 հոդվածներով Մանուկյանին առաջադրված մեղադրանքը:
Հիշեցնենք, որ պետական մեղադրող Հարություն Հարությունյանը դատարանին միջնորդել էր Հ. Մանուկյանին դատապարտել 13 տարվա ազատազրկման :
Դատական ռեպլիկների փուլում Հրանտ Գեւորգյանն ասաց, որ եթե դատարանը անտարբեր չլիներ իրենց ներկայացրած միջնորդությունների նկատմամբ, ապա քրեական գործն այլ ընթացք կունենար : Պաշտպանը դիմելով մեղադրողներին՝ հայտարարեց. « Դուք դատարան եք բերել կես, օժանդակ վարկածով գործ, դուք չեք կարող պատասխանել այն հարցին՝ Նազարյանը սպանվե՞լ է, թե՞ ինքնասպան է եղել, եթե նրան ինքնասպանության են հասցրել, ո՞վքեր են դա արել՝ 2010թ. հուլիսի 27-ի՞ն, թե՞ հուլիսի 19-ին նրա հետ շփվածները» : Հ. Գեւորգյանն ասաց, որ վկաների ցուցմունքներն անթույլատրելի ապացույցներ են, քանի որ նրանցից կորզվել են ճնշման ներքո : Նա դատարանից պահանջեց վերսկսել դատաքննությունը :
Ռեպլիկներով հանդես եկան նաեւ մեղադրող Հարություն Հարությունյանը, տուժողի իրավահաջորդ Ծովինար Նազարյանը, վերջինիս ներկայացուցիչ, իրավապաշտպան Ռուբեն Մարտիրոսյանը, Վահագն Հայրապետյանի պաշտպան Լեւոն Պողոսյանը : Քրեական գործով 4 ամբաստանյալները իրենց վերջին խոսքում հայտնեցին, որ առաջադրված մեղադրանքում մեղավոր չեն ճանաչում եւ դատարանից պահանջեցին իրենց նկատմամբ կայացնել արդարացման դատավճիռ: Վերջին խոսքը չհասցրեց հայտնել միայն ամբաստանյալ լեյտենանտ Վահագն Հայրապետյանը, քանի որ դատավոր Սամվել Մարդանյանը հետաձգեց դատական նիստը: Հայրապետյանն իր խոսքը կասի հաջորդ նիստում՝ ապրիլի 23-ին : Դրանից հետո դատավորը կհեռանա խորհրդակցական սենյակ՝ դատավճիռ կայացնելու:
Ոսկան ՍԱՐԳՍՅԱՆ
