Պետրոս Մակեյանը քննադատեց ընդդիմությանը, որ հրճվում էին:
Այսօր Ազատության հրապարակում «Ժառանգություն» կուսակցության փոխնախագահ Արմեն Մարտիրոսյանը ծաղրեց իրեն ապրիլի 9-ին ծեծող ոստիկաններին՝ ասելով, որ այնքան միս ու արյուն չեն ստացել, որ ծնկի հարվածով, ծնկի ոսկորով, որն ամենապինդն է, կարողանան քիթ կոտրել: Ինչպես նկատեցինք, Արմեն Մարտիրոսյանի քիթը միայն մի փոքր վնասվել էր եւ չէր կոտրվել:
Արմեն Մարտիրոսյանը նաեւ ասաց, որ ապրիլի 9-ը շատ լավ հնարավորություն էր՝ հասկանալու, թե ում հետ կարելի է կռվի գնալ, որովհետեւ թիկունքդ պիտի ամուր լինի: Այսպես նա ներկայացրեց Պետրոս Մակեյանին:
Կարդացեք նաև
Մակեյանի խոսքերով՝ իշխանությունները վախեցած ու սարսափած էին. «Այնպես ստացվեց, որ ժողովրդի մի մասը կարողացավ պարտադրել Րաֆֆուն, որ գնան Բաղրամյան: Իմ կարծիքով, այդ քայլը ճիշտ էր, այն հոգեբանական նշանակություն ուներ: Վարչախումբը մտածում էր, որ կոտրել է ժողովրդին, աչքը վախեցրել է, եւ այլեւս այդ ուղղությամբ չի գնալու: Վարչախումբը տեսավ, որ մարտի 1 տեսած ժողովուրդը չի վախենում: Վարչախումբը տեսավ, որ ժողովրդի դեմ խաղ չկա»: Կատարվածից Պետրոս Մակեյանը նաեւ հասկացել է, որ այս իշխանությունը ընդունակ է եւս մեկ անգամ Մարտի 1 անել:
Ըստ նրա, մեծ հաշվով Բաղրամյան գնալու քայլով ժողովուրդը շահել է: Թերացումը միայն տեխնիկական վատ կազմակերպվածությունն էր, որ մի մասը գնաց Ծիծեռնակաբերդ, մյուս մասը մնաց Բաղրամյան պողոտայում. «Եթե ամբողջ զանգվածը մնար Բաղրամյանում, միգուցե ավելի մեծ բախում կլիներ: Իսկ թե ինչպես ներկայացվեց ապրիլի 9-ը, իշխանությունն ինչպես վարվեց՝ նորմալ էր, մենք իրենցից ոչինչ չէինք սպասում, բայց ինչ արվեց ընդդիմադիր ուժերի կողմից՝ սարսափելի էր: Նրանք կարծես հրճվում էին, որ ոչ մի բան չէր ստացվում: Դուք չպետք է հրճվեիք, դուք պետք է լինեիք ժողովրդի կողքին: Ամենամեծ հատկանիշը Րաֆֆու, որ ես գնահատում եմ, դա այն էր, որ նա առաջին գծում ընտանիքի հետ էր»:
Հռիփսիմե ՋԵԲԵՋՅԱՆ
