Գեղանկարիչ Արա Հայթայանն այսօր «Նովոստի» միջազգային մամուլի ակումբում խոսեց Ճապոնիայում տեղի ունեցած ցուցահանդեսի և այսօր «Դալան» պատկերասրահում կայանալիք անհատական ցուցահանդեսի մասին:
Ամեն ինչ սկսվեց մի քանի տարի առաջ, երբ գեղանկարիչը ծանոթացավ ճապոնագետ Վարդիթեր Հարությունյանի հետ: Ինչպես գեղանկարիչն է ասում. «Ես մշակույթի մարդ, Վարդիթերը` ճապոնագետ, ով հաճախ լինում է Ճապոնիայում, իր կողմից առաջարկ հնչեց, որ կան ուժեր Ճապոնիայում, կան մարդիկ, ովքեր ուրախ կլինեն այնտեղ տեսնել հայ արվեստ և գալ այստեղ` Հայաստան»:
Եվ այսպես ստեղծվեց հայ-ճապոնական արվեստագետների համագործակցությունը: Սկզբում բավականին բարդ էր, բայց այսօր արդեն այդ գործունեությունը հինգ տարվա կյանք ունի: Ճապոնացիների համար Հայաստանը հետաքրքիր երկիր է և գեղանկարչի խոսքերով. «Մենք ինքներս ենք բացահայտում մեր երկիրը իրենց աչքերով նաև»:
Ճապոնագետ Վարդիթեր Հարությունյանը նշեց. «Ճապոնիայում համագործակցում էինք Գինզայի Ճո Մե ցուցասրահի հետ: Որի տնօրենը շատ բարեհամբույր մի կին է և անընդհատ առաջարկում էր համագործակցություն Հայաստանի հետ: Ինքը Հայաստանը շատ է սիրում և մի քանի անգամ այցելել էր: Սկզբում բարդ էր, բայց ընթացքում արդեն ավելի հեշտ էր, և մենք հասկացանք ճապոնական մտածելակերպը և ճապոնացիները մեզ: Ավելի հեշտ էր այդ համագործակցությունը»:
Գեղանկարիչ Արա Հայթայանը Ճապոնիայի Գինզայի Ճո Մե պատկերասրահում ներկայացել էր իր անհատական ցուցահանդեսով: Այսօր արդեն Հայաստանում` «Դալան» պատկերասրահում, գեղանկարիչը կցուցադրի «Կորսված բնանկարի այլաբանություն» և «Նատյուրմորտի լուսանցքներում» աշխատանքների շարքը: Ինչպես գեղանկարիչն ասաց. «Այսօրվա ցուցահանդեսը կարելի է համարել ինչ-որ մի շրջափուլի ավարտ և ամփոփում, որի մասին կարելի է խոսել և այս գործունեությունը ներկայացնել»:
Իսկ ինչ վերաբերում է «Կորսված բնանկարի այլաբանություն» ցուցահանդեսի շարքի բովանդակությանը` գեղանկարիչը հավելեց. «Սկսած 90-ական թվականներից` իմ ակունքը բնության հետ շփման դա Դալմայի այգիներն էին: Քաղաքական սրություն չտալով այս հարցին, բայց երբ որ անցյալ տարի ես իմացա, որ այդ այգիները պետք է գրեթե քանդվեն, այնտեղով պետք է ճանապարհ անցկացվի, քանի որ գարունը ես միշտ այնտեղից եմ սկսել զգալ` ճեպանկարներ անելով, կարծես դա իմ ներշնչանքի հանքերից մեկն էր`ես որոշեցի գրանցել վերջին գարունը, մինչև այդ շինարարության սկսվելը: Եվ գրեթե երկու ամիս` մարտ-ապրիլ ամիսներին, այնտեղ էի և նկարեցի մի շարք, որի վրա աշխատեցի ամբողջ 2012 թվականը: Ինքը շարքը բնապաշտական է, երբ որ գոյացավ այդ շարքը, առաջարկ կար արդեն Ճապոնիայում ցուցադրվելու: Ես որոշեցի հենց այս շարքը ցուցադրել, քանի որ ճապոնացիների մոտ հստակ ընդգծված է այս բնապաշտական գիծը` իրենց բնավորության մեջ: Եվ այսպես շարքը ցուցադրվեց այնտեղ հաջողությամբ»:
«Դալան» պատկերասրահում գեղանկարիչ Արա Հայթայանի անհատական ցուցահանդեսի բացումը տեղի կունենա այսօր՝ ժամը 18:30-ին, որը բաց կլինի մինչև ապրիլի 30-ը:
Արմինե ՀԱՄԲԱՐՁՈՒՄՅԱՆ
