«Ամբիցիաներով ինչ-որ բան ասելը, դա քաղաքական ճակատագրի վախճան է: Մտքումս պատասխանեցի: Կին է, չեմ ուզում հայհոյանքին հայհոյանքով պատասխանել, ի՞նչ պատասխանեմ»,- այսօր խորհրդարանական ճեպազրույցներում ասաց ՀՀԿ խմբակցության ղեկավար Գալուստ Սահակյանը`պատասխանելով «Ժառանգություն» խմբակցության քարտուղար Զարուհի Փոստանջյանին: Լրագրողները Սահակյանին փոխանցեցին Փոստանջյանի հայտարարությունը, որ Սերժ Սարգսյան իշխանավորին եւ նրա իշխանությանն իրենք թաղել են աղբամանում, քանի որ իրենց դրա համար հողատարածք չտրամադրվեց:
Գալուստ Սահակյանը ցավ հայտնեց, որ չհաջողվեց կազմակերպված ընդդիմություն ունենալ: Ասաց, սակայն, որ դա չի նվազեցնում այն պատասխանատվությունը, որն իշխանությունը վերցրել է իր վրա: Հասարակությունը բարձրացրել է կոնկրետ խնդիրներ եւ դրանք իրենց արտացոլումն են ունենալու առաջիկայում` կառավարության ծրագրերում եւ ոչ միայն խոսքով: «Ճանապարհը հարթ չի լինելու, բայց նաեւ հաղթահարելի է`անկախ նրանից, թե ընդդիմությունն ինչ կարգավիճակ կունենա»,- ասաց Սահակյանը:
Նա գտնում է, որ իշխանությունն այժմ ստիպված է լինելու իր վրա վերցնել նաեւ ընդդիմության ֆունկցիաները`վերահսկողական առումով, ինչը բարդացնում է իշխանության գործը:
Նելլի ԳՐԻԳՈՐՅԱՆ
