Այսօր «Հայելի» ակումբում երգիչ, «Բարեւ Երեւան» դաշինքի 8-րդ հորիզոնականը զբաղեցնող Արթուր Իսպիրյանը դժգոհեց Երեւանի խնդիրերից: Նրա խոսքերով՝ ոչ մի քաղաքապետ չկարողացավ լուծում տալ սանիտարական հարցերին, տրանսպորտի խնդիրերին. «Ես օր ու գիշեր իմ մասնագիտությունը թողած՝ զբաղված եմ Երեւանի ցավերով: Ոտքով քայլում եմ, տեսնում եմ այդ ապօրինի շինարարությունները: Բոլոր հարցերն էլ լուծելի են»:
Հարցին, թե ո՞ր հարցերով եք առաջնահերթ զբաղվելու՝ Արթուր Իսպիրյանը պատասխանեց. «Աղբահանության խնդիրը պետք է լուծվի: Ինձ համար ցավալի է, որ տատիկները առավոտ շուտ փոշիներն են ընկած փողոցներից հավաքում: Ինչ-որ նոր մեխանիզմ պետք է մտածել»:
Նա նշեց, որ այգիներն են ահավոր վիճակում գտնվում, օրինակ՝ Հաղթանակի այգին: Թե ինչպես պետք է բարեկարգել, ի՞նչ գումարներով՝ պարոն Իսպիրյանն ասաց, որ թող ՌԴ-ից քիչ երգչուհիներ կանչեն ահռելի գումարներով, այդ փողով բարեկարգեն եւ մի շարք խնդիրեր լուծեն:
Հռիփսիմե ՋԵԲԵՋՅԱՆ
