Այսօր Կապան քաղաքում մեկնարկեց վավերագրական ֆիլմերի փառատոնը, որը կշարունակվի մինչեւ ապրիլի 13-ը:
Սյունիքի մարզում փառատոնի կազմակերպիչ «Երկյակ» ԵՀԿ նախագահ Արմեն Դավթյանի խոսքով՝ փառատոնը կանցկացվի Կապան եւ Քաջարան քաղաքներում: «Այսօր եւ վաղը վավերագրական ֆիլմեր կներկայացվեն կապանցի հանդիսատեսի համար, իսկ ապրիլի 13-ին՝ քաջարանցիների համար: Կներկայացվի 6 ֆիլմ, որոնց ընտրությունը կազմակերպությունն է կատարել՝ հաշվի առնելով թեմայի արդիականությունը եւ տարածաշրջանի բնակչության հետաքրքրությունը դրանց վերաբերյալ: Փառատոնի շրջանակներում ներկայացվող ֆիլմերն առնչվում են մարդու իրավունքների, հասարակության ինտեգրման, կոնֆլիկտների լուծման եւ այլ թեմաներին, որոնց ցուցադրությունից հետո նախատեսվում է տեղում քննարկումներ կազմակերպել ֆիլմի եւ ընտրված թեմայի վերաբերյալ», – ասաց Արմեն Դավթյանը:
Կապանում փառատոնի առաջին օրը հանդիսատեսին ներկայացվեց 2 ֆիլմ՝ «Դրոնան եւ ես» եւ «Վերջին գնացքով վերադարձ դեպի տուն»: Փառատոնին որպես հյուր ներկա գտնվող կինովավերագիր, լրագրող Վարդուհի Սիմոնյանը կարեւորեց փաստավավերագրական ֆիլմերի նկարահանումները մեր օրերում: «Աշխարհն արդեն հասկացավ, որ մեծ գումարներ եւ ճոխ կրիչներ պետք չեն փաստավավերագրելու համար ճշմարտությունները, եւ բազում պատվավոր փառատոններին մասնակցեցին սովորական հեռախոսով արված ֆիլմեր եւ այդ ֆիլմերը շահեցին: Դա նշանակում է, որ դուք բոլորդ կարող եք վերցել ցանկացած կրիչ եւ փաստավավերագրել այս աշխարհում տեղի ունեցող շատ կարեւոր իրադարձությունները: Եթե մենք խաղարկային կինոյի համար չունենք համապատասխան բյուջեներ, քանի որ դրանք թանկ հաճույք են եւ մեծ հաշվով հարուստ երկրների մենաշնորհը, ապա փաստավավերագրությունը կարող է լինել Հայաստանի համար թիրախային, եւ հատկապես լեռնային շրջաներում ապրող երեխաները պետք է անպայման հեռախոսով, ձեռքի եղած կրիչով շրջեն, որովհետեւ այստեղ՝ այս աշխարհում, այնքան բան կա նկարելու… Մեկ երազանք ունեմ, որ մարդիկ այստեղ շատ նկարեն, դա շատ կարեւոր է», – նշեց Վ. Սիմոնյանը:
Հայաստանում մարզային փառատոններն անցկացվել են նաեւ Նոյեմբերյանում, Գյումրիում, Վանաձորում, Եղեգնաձորում: Իսկ վավերագրական ֆիլմերի մարզային փառատոնները նախաձեռնել է չեխական «Մարդը կարիքի մեջ» ՀԿ-ն տարածաշրջանային «Ինտերնյուս» և «Սակդոկ» գործընկերներ կազմակերպությունների եւ տեղական հ/կ-ների հետ համատեղ:
Կարդացեք նաև
Ծրագիրը ֆինանսավորվում է Եվրամիության և Չեխական զարգացման գործակալության կողմից: CAUCADOC ծրագրի շրջանակներում կազմակերպված փառատոնը մարտ-ապրիլ ամիսներին միաժամանակ անցկացվում է նաեւ Վրաստանում ու Ադրբեջանում:
Ֆիլմերը «Մեկ աշխարհ» կինոփառատոնի ֆիլմերի ցանկից են ընտրված եւ նկարահանված են աշխարհի տարբեր երկրներում, որոնք վերաբերվում են միգրացիայի, քաղաքական վարչակարգերի, մարդու իրավունքների և այլ թեմաներին:
Մերի ՍՈՂՈՄՈՆՅԱՆ
