Այսօր «Գաֆէսճեան» արվեստի կենտրոնում մեկնարկեց «Քաղաքը եւ վայրի բնությունը» նոր կրթական ծրագիրը` նախատեսված դպրոցականների համար:
Ինչպես լրագրողների հետ զրույցում նշեց «Գաֆէսճեան» արվեստի կենտրոնի հանրային կապերի եւ մարքեթինգի տնօրեն Լիլիթ Սոխակյանը, ծրագիրն իրականացվում է «Մեկուսացում. Ուրբանիզացիան հակընթաց բնությանը» ցուցահանդեսի շրջանակում:
«Ծրագրի նպատակն է` երեխաներին եւ նրանց ընտանիքներին մոտեցնել արվեստին` ավելի լավ ծանոթացնելով արվեստանմուշներին: Այսօր ծրագրին մասնակցում են Ն. Աղբալյանի անվան թիվ 19 դպրոցի մի խումբ աշակերտներ, ովքեր կծանոթանան ցուցանմուշներին, եւ թե ինչ է ուրբանիզացիան, ինչու են մարդը եւ բնությունը հեռացել իրարից: Այնուհետեւ դպրոցականների խումբը կբարձրանա ստեղծագործական սրահ, որտեղ աշակերտները կզրուցեն բնություն-ուրբանիզացիա-մեկուսացում խնդիրներից եւ կփորձեն դրանց լուծումները պատկերել թղթերի վրա: Բնությունից մարդու մեկուսացումը գլոբալ խնդիր է, այդ իսկ պատճառով երեխաները պատկերելու են մեկ ընդհանուր թղթի վրա»,-ասաց Լիլիթ Սոխակյանը:
Նա նշեց, որ աշակերտների ստեղծագործական աշխատանքները կարխիվացվեն «Գաֆէսճեան» արվեստի կենտրոնում: Նա նաեւ ասաց, որ կենտրոնի կրթական ծրագրերին մասնակցությունն անվճար է, իսկ դպրոցները նախապես են գրանցվում այցելությունների համար:
Կարդացեք նաև
Աշակերտները «Սասունցի Դավիթ» ցուցասրահում ծանոթացան Ռոբերտ Գարքի, Մարտին Սքորի, Լեո Օզբորնի, Բրեդ Ռուդի քանդակներին եւ այլ նմուշներին:
Լուիզա ՍՈՒՔԻԱՍՅԱՆ
