Տարածաշրջանային զարգացումները ինչ ազդեցություն կարող են ունենալ հայ–թուրքական հարաբերությունների վրա` թուքագետի մեկնաբանությամբ:
« Թե’ Ռուսաստանի և թե’ ԱՄՆ-ի բարձրաստիճան պաշտոնյաները հայտարարել են, որ Ղարաբաղը և հայ-թուրքական հարաբերությունները չի կարելի մեկ հանգույցում տեսնել: Սակայն վերջերս տեսանք, որ Թուրքիայի արտաքին գործերի նախարարը ԱՄՆ-ի պետքարտուղարի հետ հանդիպման ժամանակ հիշեց հայ-թուրքական հարաբերությունների մասին և կրկին փորձեց զուգահեռներ տանել ԼՂՀ-ի հարցի, հայ-թուրքական սահմանի բացման և հարաբերությունների մասին: 2009թ.-ից, սա շատ հստակ քաղաքականություն է, որը Թուրքիան վարում է, այս կծիկով փոխկապակցել մեկը մյուսով»,-այս մասին այսօր «Տեսակետ» ակումբում ասաց թուրքագետ Արտակ Շաքարյանը:
Նա կարծում է, որ արձանագրությունները վերջին ժամանակահատվածում ակտիվություն մտցրած փորձ է, որը հույս տվեց փոփոխությունների, ոչ միայն Հայաստանին և Թուրքիային, այլև շատ երկրների.«2008թ. ռուս-վրացական պատերազմից հետո, այն ռեգիոնի սահմանները փոխելու ունակ էր, որը չկարողացանք օգտագործել: Մենք պետք է դասեր քաղենք մեր սխալներից, հասկանանք, թե որտեղ սխալվեցինք, գուցե շտապեցինք, բայց պետք է հասկանալ, որ Թուրքիան ամեն բան անում է հարցը կապելով ԼՂՀ-ի հետ»:
Ըստ թուրքագետի` 2009-ի արձանագրությունը փորձ էր հաջորդ անգամ շատ ավելի որակյալ, մասնագիտորեն ավելի պատրաստված և մտածված մոտենալ այս հարցին:
Կարդացեք նաև
Բանախոսի խոսքով` Թուրքիան այնպիսի հարևան է, որի հետ մենք հարաբերություն չունենալ չենք կարող: «Տարեկան 200 մլն հասնող ապրանքափոխանակություն ունենք, շաբաթական երկու անգամ ինքնաթիռ ունենք, որն արդեն հարաբերություն է: Վաղ թե ուշ արձանագրություններ լինելու են և մեր խնդիրն է այսօր պատրաստվելու այդ փորձությանը»:
Թուրքագետն անդրադառնալով Վան-Երևան չվերթի կասեցմանը, ասաց, որ ուրախ է դրա համար: «Ես այս կասեցումը շատ դրական եմ համարում: Ապրիլի 24-ի նախօրյակին ևս մեկ ժամանակավոր հարաբերություն Թուրքիայի հետ, պարզապես ուժեղացնում է Թուրքիայի դիրքերը ապրիլի 24-ի վերաբերյալ: Եվս մեկ անգամ Օբամային ասելու էին, թե ինչ շրջափակման մասին է խոսքը, եթե մենք բացում ենք հավելյալ չվերթ: Ադրբեջանցիները կրկին սխալ հաշվարկ արեցին և վերջիններիս ճնշման տակ Թուրքիան կասեցրեց: Ի տարբերություն մեզ, Ադրբեջանում հիստերիան ավելի մեծ էր, որն այս դեպքում եղավ օգուտ մեզ»,-ասաց թուրքագետը:
Քրիստինա ՄԻՐԶՈՅԱՆ
