«Ողջույն ամենաուժեղ ֆրակցիային»,- այսօր մինչ խորհրդարանի հերթական նիստի մեկնարկը` դահլիճ մտնելով իր կուսակիցներին դիմեց ԱԺ փոխնախագահ Էդուարդ Շարմազանովը:
Պատգամավորների հարցերը մարդու իրավունքների պաշտպանին` 2012թվականի զեկույցի վերաբերյալ, ավարտվեցին: ՀՀԿ-ական պատգամավոր Սուքիաս Ավետիսյանը նեղսրտեց, որ Կարեն Անդրեասյանը փոխարեն կոնկրետ պատասխանելու պատգամավորների հարցերին, կրկին շարունակում է խեղաթյուրել դրանք: Պարոն Ավետիսյանի հարցը վերաբերվում էր աղետի գոտու բնակարանաշինությանը:
Ի թիվս այլ հարցերի, խորհրդարանն այսօր կքննարկի նաեւ 2008 թվականի մարտի մեկի դեպքերի նոր հանձնաժողով ստեղծելու հարցը: Նախագծի հեղինակները ՀՀ ԱԺ ՀԱԿ խմբակցության պատգամավորներն են: Հանձնաժողովի խնդիրն է լինելու 2008 թվականի մարտի 1-2-ին Երևան քաղաքում տասը անձանց սպանությունների, քաղաքացիական անձանց, ոստիկանության աշխատողներին և զինծառայողներին հրազենային մարմնական վնասվածքներ պատճառելու դեպքերի, ինչպես նաև դրանց պատճառներն ու կատարմանը նպաստող հանգամանքները ուսումնասիրելը ու ԱԺ-ին եզրակացություն ներկայացնել ՀՀ հատուկ քննչական ծառայության, ոստիկանության, գլխավոր դատախազության ձեռնարկած գործողությունների ու միջոցառումների օրինականության ու հիմնավորվածության վերաբերյալ: Հանձնաժողովի խնդիրներից է նաև պարզել այդ դեպքերին պետական պաշտոնյաների ունեցած առնչությունները:
Նելլի ԳՐԻԳՈՐՅԱՆ
