Հրայր Թովմասյանը հորդորում է բացել ոստիկանության լրահոսն ու տեսնել, թե քանի ոստիկանի են պատժել:
Այսօր արդարադատության նախարար Հրայր Թովմասյանը լրագրողների հետ ճեպազրույցում, գնահատական տալով երեկվա իրադարձություններին, ասաց. «Ոստիկանությունը շատ հստակ ու ճշգրիտ է իրեն ամբողջ ընթացքում պահել: Բայց ոստիկանությունը ունի իր խնդիրները, առաջին հերթին դա հասարակական կարգի պահպանությունն է, որը ոստիկանությունն իրականացրեց»:
Aravot.am-ի հարցին՝ ճշգրի՞տ էր, որ լրագրողների նկատմամբ էլ երեկ ֆիզիկական ուժ կիրառվեց, նախարարը պատասխանեց. «Յուրաքանչյուր դեպքում, եթե լրագրողը գտնում է, որ ոստիկանը խախտել է համաչափության սկզբունքը, գոյություն ունի բողոքարկման երկու ճանապարհ»: Մեր դիտարկմանը, որ այդ ճանապարհը գիտենք, Հրայր Թովմասյանն արձագանքեց. «Այսինքն ի՞նչ եք ուզում: Ուզում եք ես ինձ դնեմ ոստիկանության ղեկավարի տեղը եւ արդեն իսկ որոշում կայացնեմ կամ դատարանի՞ տեղը: Ես դա չեմ ասնի: Բայց եկեք հստակ…մենք հասկանում ենք ինչով ենք խաղում: Այսինքն, ո՞րն է մեր քայլերի հաջորդականությունը: Իրավական պետություն ենք, հստակ ընթացակարգերը նախատեսված են»: Մեր հակադարձմանը, որ այդ ընթացակարգերը ոչ մի արդյունք չեն տալիս, բացի ժամանակի կորստից, նախարարը պատասխանեց. «Ի՞նչ եք դուք ուզում, ի՞նչ արդյունքներ եք ուզում: Եթե վերցնեք ոստիկանության լրահոսը միայն եւ տեսնեք վերջին մեկ-երկու տարվա ընթացքում քանի՞ ոստիկան է քրեական պատասխանատվության ենթարկվել, քանի՞ ոստիկան է կարգապահական պատասխանատվության ենթարկվել, դա համադրեք դրա նախորդ ժամանակահատվածի հետ, դա համադրեք մեր կարգի պետություններում ձեռնարկված միջոցների հետ, կտեսնեք, թե ինչ է կատարվում, ով ինչ է անում»:
Կարդացեք նաև
Հռիփսիմե ՋԵԲԵՋՅԱՆ
