Հրատարակությունն ընդգրկում է Իրանում տպագրված մոտ 2200 գիրք:
Այսօր Հայաստանի գրողների միությունում ներկայացվեց «Հայ տպագրությունն Իրանում 1638-2011թթ» գիրքը, որի հեղինակներն են գեղանկարիչ Արշալույս Աղայանը եւ աշխարհագրական գիտությունների թեկնածու, 80-ից ավելի գիտական աշխատանքների հեղինակ, «Հայրենադարձ իրանահայերի հ/կ»-ի հիմնադիր եւ ներկայիս փոխնախագահ Բագրատ Տերտերյանը:
Ինչպես լրագրողների հետ զրույցում ասաց Արշալույս Աղայանը, գիրքն ի մի է բերում Իրանում տպագրված մոտ 2200 գիրք եւ այլ նյութեր` թերթեր, օրացույցեր, պարբերականներ, իսկ հեղինակները գրքի ստեղծման վրա աշխատել են շուրջ 7 տարի:
«Կարելի է ասել, որ հայ տպագրությունը Իրանում ներկայումս ակտիվ է, չնայած երկու տպարան է գործում: Իրանում փոքրիկ Հայաստան գոյություն ուներ դեռեւս այն ժամանակ, երբ Հայաստանում գիրք չէր տպագրվում»,-ասաց Աղայանը` տեղեկացնելով նաեւ, որ Իրանում հայ տպագրությունը մեկ գրքում ամփոփելու փորձ մինչ այդ կատարել է ամիսներ առաջ կյանքից հեռացած Լևոն Մինասյանը:
Կարդացեք նաև
ՀԳՄ նախագահ Լևոն Անանյանը ողջույնի խոսքում ուրախություն հայտնեց այն հանգամանքի առնչությամբ, որ իրանահայ համայնքը մեծ նպաստ է բերել հայ գրականությանը, քանզի հրատարակություների մեծ մասը գրական-գեղարվեստական գործեր են:
Գրքի առաջաբանի հեղինակը` Անդրանիկ Սիմոնյանը, փաստեց, որ Արշալույս Աղայանը եւ Բագրատ Տերտերյանը քաջություն եւ զոհաբերություն են ցուցաբերել` մեծ գործ կատարելով գրքի ստեղծման համար. «Նեղություն» են քաշել շատ մարդիկ, որոնց մասին շատերը չգիտեն»:
Սիմոնյանը նշեց, որ գրքի խմբագրակազմի որոշ անդամներ մահացել են` Սեպուհ Ամիրխանյանը, Լևոն Մինասյանը, Աշոտ Ստեփանյանը, Հովհաննես Գրիգորյանը:
ՀՀ սփյուռքի նախարար Հրանուշ Հակոբյանը գիրքը հայ-իրանական բարեկամության փայլուն դրսեւորում համարեց , որովհետեւ այն ցույց է տալիս, թե ինչպես է կարողաում հայը օտար երկրում մնայուն գործեր ստեղծել: Նախարարը փաստեց, որ իրանահայերը շարունակում են հայկական մշակութային կենտրոնները եւ եկեղեցիները պահպանել ու փոխանցել սերունդներին:
Միջոցառման ընթացքում ներկաներին ողջունեց նաեւ Թեհրանից ժամանած Սեպուհ արքեպիսկոպոս Սարգսյանը, ում հրամանով էլ լույս է տեսել «Հայ տպագրությունն Իրանում 1638-2011թթ» գիրքը:
Լուիզա ՍՈՒՔԻԱՍՅԱՆ
