Կինոարտադրության եւ ֆիլմերի փոխանակման ոլորտում Հայաստանի եւ Ֆրանսիայի միջեւ մշակութային կապերը խթանելու համար, մեր երկրի եւ Ֆրանսիայի միջեւ համաձայնագիր կկնքվի:
ՀՀ մշակույթի նախարար Հասմիկ Պողոսյանի` կառավարությանը ներկայացրած որոշման նախագծում համաձայնագրի անհրաժեշտությունը պատճառաբանվում է կինոարտադրության ոլորտում երկու երկրների համատեղ ժառանգության ընդլայնմամբ: Համաձայնագրով ամրագրվում է, որ համատեղ արտադրության ֆիլմը պետք է նկարահանվի տեխնիկական եւ ֆինանսական լուրջ հնարավորություններ եւ մասնագիտական փորձ ունեցող կինոարտադրող ընկերությունների կողմից: Բացի այդ, համատեղ արտադրության ֆիլմում ընդգրկված գեղարվեստական եւ տեխնիկական անձնակազմի անդամները պետք է լինեն ազգությամբ հայ, ֆրանսիացի կամ ունենան Եվրոպական Միության կամ Եվրոպական տնտեսական գոտու երկրներից որեւէ մեկի ազգային պատկանելություն: Համաձայնագիրը նաեւ ամրագրում է, թե որտեղ եւ ինչ սկզբունքով են կատարվում համատեղ ֆիլմի նկարահանումները: Եթե ֆիլմի սցենարը կամ գործողությունները պահանջում են նկարահանումներ այլ երկրների տարածում, դրանք կատարվում են Կողմերի իրավասու մարմինների համաձայնությամբ միմիայն: Համաձայնագրի պայմաններց մեկն էլ այն է, որ երկրների իրավասու մարմինները պետք է պարբերաբար դասընթացներ կազմակերպեն կինոարտադրության ոլորտի աշխատողների համար, միջոցներ ձեռնարկեն խթանելու համար յուրաքանչյուր կողմի ֆիլմերի տարածումը եւ խրախուսումը:
Համաձայնագրի առնչությամբ, դիտողություններ է հայտնել ֆինանսների նախարարությունը` մասնավորապես նշելով, որ հստակեցված չէ, թե սույն համաձայնագիրը ենթադրո՞ւմ է լրացուցիչ պարտավորություններ, թե՞ ոչ: Եթե նախատեսում է, ապա ֆիննախից հայտնում են, որ ինչպես ՀՀ 2013 թվականի պետական բյուջեով, այնպես էլ ՀՀ 2013-2015 թվականների պետական միջնաժամկետ ծախսերի ծրագրով այդ նպատակով հատկացումներ նախատեսված չեն:
Ի պատասխան, Հասմիկ Պողոսյանը հայտնել է, որ ՀՀ-ի համար լրացուցիչ պարտավորություններ չեն առաջանում եւ որ պարտավորությունները ստանձնում են կողմերի կինոարտադրող կազմակերպությունները:
Լուսինե ԲՈՒԴԱՂՅԱՆ
Կարդացեք նաև
