Այսօր ԵՊՀ եվրոպական ուսումնասիրությունների կենտրոնում տեղի ունեցավ «Հայաստան-Եվրամիություն տնտեսական հարաբերություններ. խորը և համապարփակ ազատ առևտրի համաձայնագրի ազդեցությունը երկկողմանի առևտրային կապերի վրա» թեմայով հետազոտության շնորհանդեսը: Երկլեզվանի հետազոտությունը բաղկացած է հինգ գլուխներից, որոնք վերաբերվում են պետական կառավարման համակարգի բարեփոխումներին եւ գործարար միջավայրին, Հայաստանի եւ Եվրամիության երկրների առեւտրային կապերին եւ եւս երեք ոլորտներին:
Aravot.am-ի հետ զրույցում գրքի համահեղինակ, տնտեսական գիտությունների թեկնածու Դիանա Գալոյանը նշեց, որ 1000 տպաքանակ ունեցող ուսումնասիրությունը տրամադրվելու է բուհերի գրադարաններին, ինչպես նաեւ էկոնոմիկայի նախարարությանը:
Տիկին Գալոյանը կարծում է, որ Հայաստան-ԵՄ առեւտրային հարաբերությունների մեջ մաքսատուրքերը չէ, որ ամենամեծ խոչընդոտն են:
«Այստեղ խնդիրն ավելի ներտնտեսական է: Մենք խնդիր ունենք զարգացնելու մեր արտադրական, արտահանման ներուժը: Դեռ տեխնիկական այնքան խնդիրներ ունենք»,-նշեց տնտեսագետը՝ համոզմունք հայտնելով, որ ՀՀ քաղաքացին միանգամից չի զգա համաձայնագրի դրական ազդեցությունը:
Կարդացեք նաև
Տիկին Գալոյանի խոսքով, շատ տնտեսվարող սուբյեկտներ հնարավորություն չեն ունենա մուտք գործել Եվրամիության լայն հնարավորություններ ընձեռող շուկա, որովհետեւ ուղղակի չեն կարողանա ապահովել ԵՄ կողմից հաստատված չափանիշներին:
«Այսօր էլ Եվրոպան սննդամթերքի համար այնպիսի ստանդարտներ ունի, որ դրանց դժվար է համապատասխանել»,- ասաց տնտեսական գիտությունների թեկնածուն՝ միանգամայն նորմալ համարելով նման խիստ չափորոշիչները:
«Եթե ինտեգրվում ենք, պետք է այնպիսի արտադրանք թողարկենք, որ մրցունակ լինի»,-նշեց մեր զրուցակիցը՝ հավելելով, որ խորը եւ համապարփակ ազատ առեւտրի համաձայնագրի շնորհիվ Հայաստանի ներքին շուկայում կհաստատվի առողջ մրցակցային միջավայր, որը կվերացնի մենաշնորհները:
Աշոտ ԱԹԱՅԱՆ
