Այսօրվա դրությամբ ավիատոմսերի գները մի շարք ուղղություններով շարունակվում են թանկ վաճառվել: Մոտ 10-15 հազար դրամով թանկացել է հատկապես Մոսկվայի տոմսը: Ռուսական ավիաընկերությունների հայաստանյան ներկայացուցչություններն առիթից օգտվելով, որ «Արմավիան» փակվել է եւ մրցակցությունը նվազել է, ավիատոմսերի գները միանգամից բարձրացրել են: Այս մասին Aravot.am-ի հետ զրույցում փաստեցին ավիատոմսերի վաճառքով զբաղվող ընկերությունների աշխատակիցները: Հատկապես` թանկացել են այն ուղղությունները, որտեղ մեր երկրից շատ են մեկնում:
Թանկացել են նաեւ Սանկտ Պետերբուրգի, Կրասնոդարի, Եկատերինբուրգի, Տյումենի ուղղություններով տոմսերը: Օրինակ` Կրասնոդարի տոմսը, որն ամիսներ առաջ նույնիսկ 70 հազարով կարելի էր ձեռք բերել, այսօրվա դրությամբ այդ ուղղությամբ ավիատոմսը մայիս ամսվա համար վաճառվում է 102 հազար դրամով, մոտակա օրերի համար Կրասնոդարի տոմսն ավելի թանկ արժե: Տյումենի տոմսը թանկացել է դրամով: Նովոսիբիրսկի տոմսը միայն մեկ ուղղությունը`153 հազարից դարձել է 203 հազար դրամ:
Տոմսավաճառների կանխատեսումներով՝ շուտով կթանկանան նաեւ Մինվոդիի, Ռոստովի տոմսերը, քանի որ մի շարք ուղղություններով տոմսերը թանկանալուց հետո շատ ուղեւորներ նախընտրում են ոչ թե ուղիղ չվերթով, այլ` տարանցիկ ճանապարհով մեկնել` օրինակ` Մինվոդիով, Ռոստովով:
Նկատենք, որ այս օրերին միջազգային շուկայում ավիավառելիքի թանկացումներ չեն գրանցվել, ինչով, սովորաբար, ավիաընկերությունները պատճառաբանում են ավիատոմսերի թռիչքային թանկացումները: Տոմսերի գների բարձրացման պատճառները պարզելու համար արդեն երկրորդ օրն է՝ ավիաշուկայում ուսումնասիրություն է անում տնտեսական մրցակցության պաշտպանության պետական հանձնաժողովը:
Կարդացեք նաև
Լուսինե ԲՈՒԴԱՂՅԱՆ
