Մեկնարկում է «Եկեղեցական ճարտարապետություն և արդիականացում» ֆորումը
Նորարար փորձարարական արվեստի կենտրոնում (ՆՓԱԿ) ապրիլի 11-13-ը տեղի կունենա «Եկեղեցական ճարտարապետություն և արդիականացում» ֆորումը, որն իրականացվում է ՆՓԱԿ-ի եւ Ճարտարապետական միջավայրի ուսումնասիրության կենտրոնի (ՌեԱրկ) կողմից` «Բաց հասարակության հիմնադրամի» աջակցությամբ` «Միջդիսցիպլինար հարթակների զարգացում» մշակութային ծրագրի շրջանակում: Այսօր այս մասին ՆՓԱԿ-ում լրագրողներին հայտնեց ծրագրի ղեկավար Սեդա Շեկոյանը:
Նա տեղեկացրեց, որ ծրագիրը ներառում է 4 ֆորում` մշակույթի եւ արվեստի մի շարք ոլորտների առնչությամբ` ճարտարապետություն, գրականություն, թարգմանություն. «Նախատեսվում է նաեւ հրատարակել երկու գիրք, որոնք կամփոփեն սեմինարներն ու ֆորումները»:
«Եկեղեցական ճարտարապետություն և արդիականացում» ֆորումի շուրջ Սեդա Շեկոյանը նշեց, որ «արդիականացում» հասկացությունը սահմանելու է բանախոսներից յուրաքանչյուրը` ներկայացնելով խնդրի վերաբերյալ իր մասնագիտական տեսակետերը:
Կարդացեք նաև
«Ֆորումի նպատակն է` հասկանալ, թե ճարտարապետական ինչ կերպարով կարելի է եկեղեցի կառուցել, որը առավել նպատակահարմար կլինի արդի հասաակության պահանջներին եւ պատկերացումներին: Ճարտարապետությունը, ինչպես հայտնի է, արվեստի մյուս ճյուղերի պես սահմանափակված չէ ինքն իր մեջ»,-ասաց Ճարտարապետական միջավայրի ուսումնասիրության կենտրոնի (ՌեԱրկ) նախագահ, ֆորումի համադրող Եվա Սարգսյանը:
Նրա դիտարկմամբ. «Եկեղեցական ճարտարապետությունն այսօր Հայաստանում շարունակվում է նույն` վաղ միջնադարից մինչ ուշ միջնադար ձգվող ճարտարապետական կերպարի մեջ: Ընդ որում, հարցը վերաբերում է ոչ միայն ճարտարապետությանը, այլեւ եկեղեցի հաստատությանը, որը դարերի ընթացքում չի վերանայել իր դիրքերը եւ գործառույթները` երկրի ու ազգի կյանքում»:
Եվա Սարգսյանի խոսքով. «Պետք է անդրադառնալ ճարտարապեության հիմքում գտնվող գլոբալ-մշակութային իրավիճակին, եւ, ինչու չէ, քաղաքական իրադրությանը, հասարակության խնդիրներին, նաեւ եկեղեցի ինստիտուտի էությանը, գործառույթներին եւ հասկանալ, թե որն է եկեղեցու դերն այսօրվա հասարակության կյանքում»:
Ֆորումի համադրողը նաեւ ասաց, որ նպատակ չունեն գլոբալ հեղափոխություն անել եկեղեցու դերի եւ դիրքերի խարխլման ուղղությամբ. «Հավատացած ենք, որ եկեղեցին էլ կարող է համաձայն լինել: Չի կարելի չընդունել, որ արդիականացումը դրական երեւույթ է: Պետք է աշխատենք դուրս բերել կառուցողական եզրահանգումներ եւ առաջարկներ»:
Լուիզա ՍՈՒՔԻԱՍՅԱՆ
