Վարդան Օսկանյանը հրավիրվել է ԱԱԾ՝ Սիվիլիթաս հիմնադրամին չպատկանող (չվարձակալված) ավտոմեքենաները վառելիքով լիցքավորելու, լվանալու եւ աշխատավարձի վճարման նետ կապված ինչ–որ հարցեր ճշտելու նպատակով։
«ՉԻ» – Այո… Փաստորեն՝ Հայաստանի հատուկ ծառայությունները լուրջ կասկածներ ունեն, որ Վարդան Օսկանյանի ղեկավարած հիմնադրամը չարամտորեն եւ առանձնակի դաժանությամբ գումարներ է հատկացրել նաեւ հիմնադրամին չպատկանող մեքենաների լվացման համար։ Մեր տեղեկություններով՝ առաջիկայում մի շարք փորձաքննություններ կանցկացվեն նաեւ «մոյշնիկներին» տրված թեյավճարների ընդհանուր ծավալը պարզելու համար։ Իսկ եթե պարզվի, որ հիմնադրամի գումարներով տվյալ ավտոմեքենաներում նաեւ անձեռոցիկներ են հայտնվել, միանգամից ակնհայտ կդառնա, որ միջազգային մութ ուժերն այդպիսով փորձել են խարխլել մեր պետականության հիմքերը։
Մի խոսքով՝ փողերի լվացման գործը շատ սահուն վերածվում է ավտոմեքենաների լվացման գործի։ Հուսով ենք՝ մեր հատուկ ծառայությունները նույնքան գգոն եւ աչալուրջ կլինեն եւ այս դավադրությունը կբացահայտեն մինչեւ մայիսի 5-ը։ Որպեսզի հանկարծ Երեւանի ընտրությունների վրա ստվեր չընկնի։
«Չորրորդ ինքնիշխանություն»
