«Առաջին լրատվական»-ի զրուցակիցն է «Բարգավաճ Հայաստան» խմբակցության պատգամավոր Մարտուն Գրիգորյանը:
– Պարոն Գրիգորյան, «Բարգավաճ Հայաստան» կուսակցությունը Սերժ Սարգսյանի երդմնակալության արարողությանը մասնակցել-չմասնակցելու որոշում չի կայացրել: Կոնկրետ Դուք ի՞նչ եք անելու, մասնակցելո՞ւ եք, թե՞ ոչ:
– Մենք ազատ ենք, և կուսակցությունը որոշում չի կայացրել, որ մենք նիստին չպետք է մասնակցենք: Ինչ-որ բոյկոտելու խնդիր մեր առջև դրված չէ: Այս դեպքում ամեն մի պատգամավոր, բնականաբար, իր հարմարությանն է նայում:
– Դուք անձամբ մասնակցելո՞ւ եք:
Կարդացեք նաև
– Մասնակցելու-չմասնակցելու համար ես վաղը կկողմնորոշվեմ:
– Ե՞րբ եք կողմնորոշվելու, հաշված ժամեր են մնացել այդ արարողությանը:
– Երբ եք ուզում, որ կողմնորոշվեմ:
– Կուզենայի, որ հիմա պատասխանեիք:
– Հիմա՞: Քո խաթեր կողմնորոշվեցի՝ վաղը մասնակցելու եմ:
– ԲՀԿ ղեկավար Գագիկ Ծառուկյանը հայտարարել է, թե եթե ինչ-որ մեկը փորձի նեղացնել կամ վիրավորել ԲՀԿ-ականի, ապա ինքը դա դիտարկելու է որպես իր դեմ ուղղված վիրավորանք, և վիրավորողն «իր հետ է գործ ունենալու»: Ինչո՞ւ է Ծառուկյանը նման հայտարարություն արել, նախընտրական շրջանում ինչ-որ քաղաքական լարվածությո՞ւն կա ԲՀԿ-ի դեմ:
– Լարվածության խնդիր չկա, Գագիկ Ծառուկյանը ԲՀԿ ղեկավարն է, և անկախ ընտրություններից, անկախ քաղաքական իրադարձությունների ընթացքից` եթե իր թիմակիցներից մեկին նեղացնում են, անհիմն վիրավորում են, բնականաբար նա՝ որպես կուսակցության առաջնորդ, պետք է կանգնի իր թիմակցի կողքին: Ես որևէ արտառոց բան չեմ տեսնում, որ կուսակցության առաջնորդն իր թիմակցին պաշտպանի, եթե նրան անհիմն նեղում կամ ճնշում են:
– Իսկ նման միտո՞ւմ կա:
– Ես չեմ կարող ասել, եթե կուսակցության առաջնորդն այդ հայտարարությունն արել է, ավելի ճիշտ կլինի մամուլի խոսնակից ճշտել: Բայց եթե նման բան կա, պարոն Ծառուկյանն իր խոսքը ասել է, որի հետ ես լիովին համամիտ եմ:
– Իսկ ձեզ երբևէ վիրավորե՞լ են որևէ կուսակցությունից:
– Բացարձակ: Ես որևէ մեկին թույլ էլ չեմ տա:
– Իսկ նկատե՞լ եք, որ ԲՀԿ-ի` Ձեր որևէ գործընկերոջ վիրավորեն:
– Ես չեմ նկատել:
– Այսինքն` Գագիկ Ծառուկյանի հայտարարությունն անհի՞մն է:
– Ուրեմն` պարոն Ծառուկյանի այդ հայտարարության հետ ես լիովին համամիտ եմ: Իսկ եթե նա նման հայտարարություն արել է, ուրեմն մի բան գիտի: Եթե եղել է` եղել է, իսկ եթե չի եղել` ուղղակի զգուշացնում է, որ չանեն:
– Այսինքն` նախապես մա՞տ է թափ տալիս:
– Այո (ժպտում է):
– Գագիկ Ծառուկյանի այդ հայտարարությունը կարծես թե Հանրապետական կուսակցությանն է ուղղված, հատկապես, որ Երևանի ավագանու ընտրությունների հետ կապված ԲՀԿ-ի ու այդ կուսակցության միջև լարվածություն կա:
– Բայց ինչո՞ւ եք զարմանում, որ լարվածություն կա: Դա մրցակցություն է: Այս պահի դրությամբ գոնե Հանրապետական-«Բարգավաճ Հայաստան» խոշոր կուսակցություններն իրար հետ մրցում են: Բնականաբար, չի կարող լարվածություն չլինել: Հատկապես այն պարագայում, երբ ԲՀԿ-ն հայտարարում է, որ պայքարին շատ լուրջ է տրամադրված, ու ամեն ինչ անելու է, որ նորմալ, թափանցիկ ընտրություններ լինեն:
– Իսկ միգուցե այդ երկու կուսակցությունների մեջ եղած հակասությո՞ւնն է խորացել:
– Ինչի՞ հետ կապված:
– ԲՀԿ-ն ցանկանում է, որ վարչապետի պաշտոնում նշանակվի իր համար ցանկալի մարդ:
– ԲՀԿ-ն այդ մասին հայտարարե՞լ է: ԲՀԿ պատգամավորներն այս տարիների ընթացքում ինչ-որ հարցեր, որ բարձրաձայնել են, առկա խնդիրների մասին են խոսել, ու դրանց վերաբերյալ բազմիցս գնահատականներ տրվել են: Հիմա, եթե այդ գնահատականները Ձեր որոշմամբ վերագրում եք վարչապետին կամ ինչ-որ նախարարների… Մենք տարիների ընթացքում մեր ասելիքն ասել ենք:
