Քիչ հետո Մարզահամերգային համալիրում կմեկնարկի նախագահ Սերժ Սարգսյանի երդմնակալության երկրորդ արարողությունը: Ճակատագրի հեգնանքով, Սերժ Սարգսյանի երդմնակալության արարողությունները այդպես էլ տոն չդարձան, թեպետ իրենց մամուլի ասուլիսներում հանրապետական պատգամավորները հայտարարում էին, որ նախագահի երդմնակալությունն իրենց համար տոն է:
Սերժ Սարգսյանի երդմնակալության ե՛ւ առաջին, ե՛ւ երկրորդ արարողությունները ուղեկցվեցին սկանդալներով: Եթե 2008-ին Սերժ Սարգսյանը ստիպված էր երդվել օպերայի բեմում՝ թաքնվելով զինվորների ետեւում, ապա այժմ Սերժ Սարգսյանը պատրաստվում է երդվել Մարզահամերգային համալիրի տոնականորեն զարդարված դահլիճում: Եթե 2008-ին Սերժ Սարգսյանի երդմնակալության արարողությունը զուգադիպեց մարտիմեկյան 10 զոհերի քառասունքի արարողության հետ, ապա այժմ այն ուղեկցվում է Ազատության հրապարակում կայանալիք այլընտրանքային թագադրման արարողությամբ: Այդ երկու իրադարձությունները գուցե հանրապետական կուսակցական վերնախավի կամ նախագահի մերձավորագույն շրջապատի համար տոն են, սակայն հայ հանրության համար երկու դեպքում էլ պայքարի, ըմբոստանալու եւ ընդվզելու հետեւանք են:
Արդեն Մարզահամերգային համալիր են ժամանում Սերժ Սարգսյանի երդմնակալությանը հրավիրված անձինք:
Առավոտից մայրաքաղաքի փողոցներում մեզ հետ զրույցներում աշխատանքի շտապող մարդիկ մի տեսակ ոչ տոնական տրամադրությամբ արձագանքեցին մեր հարցին, թե՝ Ազատության հրապարակի՞ արարողությունն է իրենց համար առավել նշանակալից, թե՞ Մարզահամերգային համալիրի:
Կարդացեք նաև
Մեր զրուցակիցներից մեկն էլ հիշեց ԱՄՆ նախագահի երդմնակալության արարողությունը, որը տեղի է ունենում Սպիտակ տան բակում՝ նախագահի կողմնակիցների մասնակցությամբ: Իսկ մեզ մոտ որտեղ ով կերդվի, ում ինչ երդում կտա, մեր համաքաղաքացիների մեծամասնության համար էական նշանակություն չունի, քանի որ ՀՀ քաղաքացու տեղը ճամբարներից ոչ մեկում առանձնացված չէ, յուրաքանչյուրը յուրայիններով: Ու մինչ նախագահները պաշտոնապես եւ ոչ պաշտոնապես պատրաստվում են օծվել, հայաստանցիները շարունակում են ապրել իրենց ամենօրյա հոգսով, բայց մեկ մտավախությամբ՝ հանկարծ արկածախնդրություններ չլինեն:
Նշենք, որ գիշերը ջրցան մեքենաներ են հայտնվել Երեւանում:
Մանրամասները՝ Անահիտ Հովհաննիսյանի տեսանյութում:
Նելլի ԳՐԻԳՈՐՅԱՆ
