Այսօր Արաբկիր համայնքում բնակիչների հետ կարճատեւ հանդիպման ժամանակ ՕԵԿ ավագանու ցուցակը գլխավորող Արմեն Երիցյանը անկեղծացավ. «Երբ ինձ առաջարկեցին լինել ցուցակի առաջին համարը, ինձ համար այդքան էլ հաճելի չէր: Մտածում եմ՝ իսկ ինչի՞ համար է դա պետք, որովհետեւ ոչ թե վայելում ես, այլ չարչարվում ես»:
Պարոն Երիցյանը հանդիպմանն անդրադարձավ քաղաքի ապօրինի շինարարությանը, վերելակների խնդրին եւ ասաց, որ այդ հարցերն իրենց ուշադրության կենտրոնում են լինելու. «Երեւանցին քնից պետք է զարթնի: Տեսնում եք երեւանցին համարյա հարգանք չունի: Տեսնում ենք, որ ամեն ժամանակ ինչ-որ մեկը գալիս է երեւանցուն թելադրում է, բայց կարծում եմ՝ երեւանցիների ղեկավարը պետք է լինեն երեւանցիները»:
Նա նաեւ հավաքվածներին ասաց, որ իրենց ծրագրերը պետք է կյանքի կոչեն միասին. «Երեւանցիները պետք է վերջիվերջո հասկանան, որ Երեւանի տերն ու տիրակալը երեւանցիներն են: Այնպես պետք է անենք, որ մեր խոսքը հասցնենք եւ ասենք ինչ ենք ուզում…Ես մի վատ թերություն ունեմ՝ չեմ կարողանում սուտ խոսել, դա իմ լուրջ խնդիրն է, որ մեկ-մեկ պետք է կարողանաս նաեւ սուտ խոսել, բայց ես չեմ կարողանում: Եթե մի բան խոսք եմ տալիս, ուրեմն պետք է մինչեւ վերջ անեմ: Գտնում եմ, որ կարող ենք անել ավելին եւ անելու ենք»:
Արփինե ՍԻՄՈՆՅԱՆ
Կարդացեք նաև
