Այն, որ «Բարգավաճ Հայաստան» կուսակցության նախագահ Գագիկ Ծառուկյանը վաղը չի մասնակցելու Սերժ Սարգսյանի երդմնակալության արարողությանը՝ կարելի՞ է դիտարկել Սերժ Սարգսյանի դեմ ուղղված քայլ, Aravot.am-ի այս հարցին ԲՀԿ խմբակցության քարտուղար Նաիրա Զոհրաբյանն ասաց. «Ոչ, որովհետեւ պարոն Ծառուկյանը նախապես ծրագրավորված մասնավոր այց ուներ արտերկիր»:
Հիշեցնենք, որ «Բարգավաճ Հայաստան» կուսակցության նախագահ Գագիկ Ծառուկյանի մամուլի խոսնակ Իվետա Տոնոյանն այսօր «Ազատություն» ռադիոկայանի հետ զրույցում տեղեկացրել էր, որ Գագիկ Ծառուկյանը չի մասնակցելու նախագահ Սերժ Սարգսյանի վաղը կայանալիք երդմնակալության արարողությանը:
Հետաքրքրվեցինք` այդ այցն այդչափ կարեւո՞ր էր, որ հետաձգելն անհնար էր, մանավանդ, որ պարոն Ծառուկյանը մինչ օրս այդպես էլ հրապարակային չի շնորհավորել Սերժ Սարգսյանին` վերընտրության առիթով: Տիկին Զոհրաբյանն ասաց. «Ես ինձ իրավունք չեմ վերապահի գնահատականներ հնչեցնել, բայց որեւէ անկարեւոր քայլ պարոն Ծառուկյանը չի անում: Եթե գնացել է, ուրեմն կարեւոր էր»:
Նելլի ԳՐԻԳՈՐՅԱՆ
