Ավագանու ընտրություններին ՕԵԿ-ի նախընտրական ծրագրի առաջնահերթություններից «Երեւանն առանց աղքատության» համալիր ծրագիրն է: Առաջիկա 4 տարիներին, ՕԵԿ-ը՝ ընտրվելու դեպքում, խոստանում է նվազագույնի հասցնել աղքատությունը, նոր աշխատատեղեր ստեղծել և բնակչության զբաղվածությունն ընդլայնել:
Նախընտրական հաջորդ խոստումն էլ՝ «Մաքուր և բարեկարգ մայրաքաղաք» ստեղծելն է: Կուսակցությունը խոստանում է քաղաքի աղբահանության հիմնախնդրի լուծում, Երևանի գլխավոր և երկրորդական փողոցների բարեկարգում, լուսավորում: Ինչպես նաեւ քաղաքի բնապահպանական նոր քաղաքականության ձևավորում, կանաչ ճարտարապետության ավանդույթների վերականգնում ու զարգացում:
Հաջորդ խոստումը՝ «Երևանի համաչափ զարգացում» ռազմավարական ծրագիրը մայրաքաղաքի բոլոր թաղամասերի համար նախատեսում է համաչափ զարգացում, Երևանի ճարտարապետաշինարարական, պատմամշակութային, առողջապահական, գիտատեխնիկական, ինովացիոն, կրթական, արտադրական, առևտրային հանգույցների ստեղծում և բարենպաստ բիզնես միջավայրի ձևավորում` ոչ միայն Երևանի կենտրոնում, այլ բոլոր վարչական տարածքներում:
Նախընտրական ծրագրում ՕԵԿ-ն առաջարկում է քաղաքի կառավարման այս մոդելը՝ ձևավորել քաղաքացիների համար աշխատող իշխանություն: Ծրագրում առաջարկվում է՝ որդեգրել «Քաղաքային իշխանությունը պետք է ծառայի երևանցուն» կարգախոսը և առաջնորդվել հետևյալ սկզբունքներով.
Կարդացեք նաև
• համարձակ նորարարական բարեփոխումներ` ուղղված Երևանի զարգացմանը և երևանցիների շահերի պաշտպանությանը,
• քաղաքի կառավարման բոլոր ոլորտների համար վճռական և հիմնավորված զարգացման կարճաժամկետ և երկարաժամկետ ծրագրերի մշակում և իրականացում,
• սոցիալական ծայրահեղ բևեռվածությունից, հուսալքությունից և անտարբերությունից, բյուրոկրատական քաշքշուկներից, քաղաքային իշխանության հանդեպ անվստահության մթնոլորտից ձերբազատվելուն ուղղված հետևողական ու կոնկրետ քաղաքականության իրականացում,
• քաղաքային իշխանության համակարգում ավագանու դերի կարևորում և բարձրացում,
• քաղաքային իշխանության գործունեության թափանցիկության, տեղեկատվայնության, վերահսկողության, պատասխանատվության և կատարողական կարգապահության մեխանիզմների ներդրում և ամրապնդում,
• քաղաքի կառավարման մարմինների համակարգի օպտիմալացում և գործունեության արդյունավետության բարձրացում,
• քաղաքային իշխանության գործունեության վերաբերյալ քաղաքացիներին կանոնավոր տեղեկատվության ապահովման համակարգի ստեղծում,
• Երևանին և երևանցիներին առնչվող կենսական կարևորության հարցերի վերաբերյալ որոշումներ ընդունելուց առաջ հանրային լսումների կազմակերպում, այդ նպատակով հասարակական հիմունքներով փորձագիտական խմբերի ստեղծում,
• քաղաքի կառավարման մարմինների ընդունված որոշումների հրապարակայնության ապահովում, քաղաքացիների դիմումների և բողոքների հետ աշխատանքի կտրուկ բարելավում,
• քաղաքի հասարակական կարգուկանոնի, արտակարգ իրավիճակների կառույցների հուսալի գործունեության, հասարակական անդորրի և անվտանգության ապահովում :
Արփինե ՍԻՄՈՆՅԱՆ
