Դիարբեքիրի առեւտրի եւ արդյունաբերության պալատի նախագահ Դիյաեդին Գեզերը, ով ժամանել է Երեւան՝ մասնակցելու հայ եւ թուրք գործարար կանանց ֆորումին, ի թիվս այլ թուրք գործարարների՝ նույնպես ցանկանում է հայ-թուրքական սահմանը բաց տեսնել:
«Թուրքիայի համար կովկասյան եւ ռուսական շուկաներ մուտք գործելու տեսանկյունից Հայաստանը, թերեւս, ամենահարմար գործընկերը կարող է լինել: Նույն հաջողությամբ Հայաստանի համար Թուրքիան կարող է ամենակարճ ճանապարհը լինել դեպի Եվրոպա»,- Aravot.am-ի հետ զրույցում նշեց թուրք պաշտոնյան՝ նկատելով, որ գործարար կապերի միջոցով հնարավոր է զարգացնել երկու երկրների միջեւ այլ ոլորտներում համագործակցությունը:
Դիյաեդին Գեզերի խոսքով՝ արդեն երկու տարի է, ինչ թուրք գործարարները որոշակի ճնշումներ են գործադրում թուրքական իշխանությունների վրա՝ հայ-թուրքական սահմանը բացելու համար:
Դիարբեքիրի առեւտրի եւ արդյունաբերության պալատի նախագահը, անդրադառնալով Երեւան-Վան-Երեւան ուղիղ չվերթի անորոշ ժամանակով հետաձգման թեմային, կոնկրետ պատճառներ չնշեց, միայն՝ ասաց.
«Շատ տարբեր պատճառներ կարող է ունենալ թռիչքի հետաձգումը, բայց մենք հավատում ենք, որ կարճ ժամանակահատվածում այն նորից կվերականգնվի»:
Նշենք, որ հայ եւ թուրք կանանց ֆորումի ժամանակ դահլիճում ներկա թուրք գործարարները իրենց խոսքում անընդհատ կարեւորում էին սահմանների վերաբացումը, իսկ հայկական կողմը խնդրում էր քննարկումը չքաղաքականացնել:
Աշոտ ԱԹԱՅԱՆ
