«Ես մի քանի անգամ Րաֆֆի Հովհաննիսյանին առաջարկ արել եմ: Պե՞տք է մի անգամ էլ անեմ»,- այսօր լրագրողների հետ ճեպազրույցում ասաց ԱԺ նախագահ Հովիկ Արահամյանը՝ հիշեցնելով, որ երբ Րաֆֆի Հովհաննիսյանը հացադուլ էր անում, ինքն այցելել է նրան. «Մենք շատ ջերմ զրույց ենք ունեցել»:
Հարցին՝ չե՞ք բացառում, որ Սերժ Սարգսյանը նորից առաջարկ անի Րաֆֆի Հովհաննիսյանին, նստեն, խոսեն՝ նա պատասխանեց. «Ես չեմ բացառում որեւէ հանդիպում, որեւէ քննարկում: Ես ուրախ կլինեմ յուրաքանչյուր հանդիպման եւ քննարկման համար: Համոզված եմ, որ այդ հանդիպումներում կարող են ծնվել ավելի ողջամիտ առաջարկներ եւ քննարկումներ: Ես ուզում եմ, որ բոլոր քաղաքական ուժերը միասին համագործակցեն՝ ի շահ պետության: Դա իմ ցանկությունն է: Ես առաջարկեցի խորհրդարանում քննարկենք, արտահերթ նիստ հրավիրենք: Այնպիսի հարցեր են ցանկանում դնել օրակարգում, որը մեզ համար անընդունելի է: Ես չեմ կարող քննարկել մի հարց, որը Սահմանադրությանը հակասում է, օրինակ՝ նախագահական նոր ընտրություններ, արտահերթ խորհրդարանական ընտրություններ: Ինչքան էլ մեր գործընկերները ինձ մեղադրում են, որ ես ասում եմ ողջամիտ առաջարկություններ արեք, իրոք, դա ողջամիտ առաջարկություն չի: Կլինի այն, որ անլուրջ հարց ենք քննարկում»:
Հարցին՝ պատրաս՞տ եք զիջել այն 8 պաշտոնները, որն առաջարկել էր Րաֆֆի Հովհաննիսյանը՝ Հովիկ Աբրահամյանը պատասխանեց, որ զիջողն ինքը չի, ՀՀ նախագահն է:
Անդրադառնալով Երեւանի ավագանու ընտրություններին՝ Հովիկ Աբրահամյանն ասաց, որ ամեն ինչ անելու են, որ ամեն ինչ լինի կոռեկտության սահմաններում եւ հաղթի ՀՀԿ-ն. «Մենք բոլորին համարում ենք մեզ մրցակից, եւ որեւէ մեկի հետ չենք մարտնչում: Մենք փորձելու ենք ամեն ինչ անենք, որ մեր ավագանիների թիվը շատ լինի Երեւանի քաղաքապետարանում: Դա է մեր խնդիրը»:
Կարդացեք նաև
Aravot.am-ը հետաքրքրվեց՝ ինչպե՞ս եք փորձելու, ընտրակաշառք լինելո՞ւ է: Ի պատասխան՝ Հովիկ Աբրահամյանը հորդորեց դիմել շտաբին եւ շտաբը կպատասխանի:
Հռիփսիմե ՋԵԲԵՋՅԱՆ
