ՀԱԿ կուսակցությունը (ՀԱԿԿ) ներկայացրել է իր ծրագրի ու կանոնադրության նախագիծը: Ըստ ՀԱԿԿ կանոնադրության` կուսակցության նպատակն է ազատական, ժողովրդավարական սկզբունքների հիման վրա ապահովել ՀՀ քաղաքական, տնտեսական և հոգևոր զարգացումը: Ըստ այդմ` ՀԱԿԿ-ի անդամ կարող է դառնալ 18 տարին լրացած, կուսակցության անդամ լինելու իրավունք ունեցող ՀՀ յուրաքանչյուր քաղաքացի, ինչպես նաև ՀՀ ընտրական իրավունքով օժտված անձ, որն ընդունում է կուսակցության ծրագիրն ու կանոնադրությունը, ցանկանում է մասնակցել վերջինիս գործունեությանը և չի հանդիսանում այլ կուսակցության անդամ:
ՀԱԿԿ-ի ծրագիրը սկսվում է պատմական ակնարկով: Այստեղ ներկայացված է հայ ժողովրդի պատմական ուղին` սկսած օտարի տիրապետության տակ գտնված տարիներից, մինչև 1918-ին պետականության վերականգնում, Ղարաբաղյան շարժում, 1998-ի պետական հեղաշրջում: Անդրադարձ է կատարվում նաև ՀԱԿ-ի ձևավորած համաժողովրդական շարժմանն ու ռեժիմի հակազդեցությանը: Որպես մուտքի ամփոփում` նշված է. «Արդեն շուրջ 15 տարի Հայաստանն ապրում է ոչ օրինակարգ իշխանության եւ սահմանադրական կարգի խաթարման պայմաններում։ Այս հանգամանքը թելադրում է Ծրագրում ունենալ որոշակի առաջնահերթ, մեկանգամյա լուծելիք խնդիրներ, առանց որոնց անիմաստ է հասարակական կյանքը սոցիալ-ազատականության կամ քաղաքական որեւէ այլ գաղափարախոսության վրա վերափոխելու որեւէ ծրագիր»:
Ծրագրում ամրագրված հիմնական քաղաքական սկզբունքներն են «անկախ պետականությունը, ժողովրդավարությունը, իրավական պետությունը, սոցիալական արդարությունը»:
Արժեհամակարգային հիմնադրույթներից են «հայոց լեզուն և ազգային մշակույթը, քաղաքացին, խաղաղությունը, ազատությունը, սոցիալական արդարությունը»:
Կարդացեք նաև
Ծրագրի Արտաքին քաղաքականություն բաժնում ՀԱԿԿ-ն ամրագրում է, որ «Հայաստանը ներկա ռեժիմի օրոք շեղվել է համաշխարհային գործընթացների գլխավոր մայրուղուց, դատապարտվել քաղաքական եւ տնտեսական մեկուսացման, դուրս մնացել տարածաշրջանային զարգացման ծրագրերից եւ հայտնվել երրորդ աշխարհի հետամնաց երկրների շարքում։ Հայաստանի Հանրապետության արտաքին քաղաքականությունը պետք է ուղղված լինի տարածաշրջանում եւ աշխարհում կայուն խաղաղության եւ տնտեսական համագործակցության ապահովմանը»: Սոցիալական քաղաքականություն բաժնում կուսակցությունը ներդնում է «լրացուցիչ կենսաթոշակ» հասկացությունը ու նշում. «Պետական պարտադիր վճարումներից ձևավորվում է կայուն, երաշխավորված պետական կենսաթոշակը։ Դրան պետք է ավելանա լրացուցիչ կենսաթոշակը՝ քաղաքացիների կամավոր եւ գործատուների պարտադիր վճարումներից»։
ՀԱԿԿ-ն առաջարկում է ապահովել համակարգ, որը կնպաստի «ՀՀ յուրաքանչյուր քաղաքացու վերարտադրողական առողջության ապահովմանը», առաջարկում է բարձրացնել երեխաների ծննդյան համար մայրերին տրվող միանվագ նպաստները՝ այն կապելով միջին աշխատավարձի հետ։
Կրթության բնագավառի ֆինանսավորման առումով կուսակցությունը նպատակահարմար է համարում ներդնել «Սովորողների ֆինանսավորման կրթության պետական հավաստագրման քարտային անհատական համակարգ, որպեսզի ֆինանսավորվեն ոչ թե դպրոցները, այլ աշակերտները»:
Մշակութային հաստատությունների նոր`տարբերակված համակարգի գործունեությունը ևս կուսակցության համար ծրագրային հիմնադրույթ է: Ըստ կուսակցության` ապակենտրոնացված համակարգի անցումը կապահովի մշակութային հաստատությունների եւ ստեղծագործական նախաձեռնությունների սեփականության, ղեկավարման, ֆինանսավորման ձեւերի բազմազանությունը:
Տաթև ՀԱՐՈՒԹՅՈՒՆՅԱՆ
