Հարգելի գործընկերներ,
Մայիսի 5-ին «Բարգավաճ Հայաստան» կուսակցությունը կմասնակցի Երևանի ավագանու ընտրություններին: Մենք կմասնակցենք հաղթելու վճռականությամբ և դրանով իսկ սկիզբ կդնենք երկրում առավել խորքային փոփոխությունների համար:
Այս ընտրությունները խիստ կարևոր են: Ֆորմալ իմաստով քաղաքային ընտրություններ են, բայց ըստ էության՝ համապետական՝ հաշվի առնելով Երևանի կշիռը հանրապետությունում: Երևանն իր ներուժով և կարողություններով պետություն է պետության մեջ: Ես կուզենայի, որ մեր հասարակությունը նույնպես լրջագույնս վերաբերվեր այս ընտրություններին և այն անպայմանորեն դիտարկեր և՛ քաղաքական, և՛ քաղաքային հարթություններում:
Մինչև ընտրության օրը երկրում տեղի կունենան մի քանի կարևոր իրադարձություններ և գործընթացներ:
Կարդացեք նաև
Առաջին, ընդամենը երկու օրից տեղի կունենա նախագահի երդմնակալության արարողությունը:
Երկրորդ, երդմնակալությունից մեկ շաբաթ անց կլինի վարչապետի և կառավարության նշանակումը:
Երրորդ, ակնկալվում է, որ կշարունակվի նախագահական ընտրություններից հետո սկսված բողոքի ալիքը:
Չորրորդ, կընթանա քաղաքի ընտրությունների մեկամսյա ընտրարշավը:
Սրանք շաղկապված են: Կախված նրանից, թե ինչ զարգացումներ կլինեն յուրաքանչյուր դեպքում, դրանք անպայման ազդեցություն կունենան մյուսների վրա:
Ապրիլի 9-ին նախագահը կկատարի իր երդումը Սահմանադրության և Ավետարանի վրա, սակայն դա չի փարատի ընտրությունների արդյունքների նկատմամբ հանրության կասկածը, ինչը և հաջորդ տարիներին օրինակարգության խնդիրներ կառաջացնի գործադիրի համար՝ ստվերելով նրա գործունեությունը:
Կախված նրանից, թե ով կնշանակվի վարչապետ, և կառավարության ինչ կազմ կունենանք՝ ինչ ծրագրով, պարզ կդառնա՝ արդյոք իշխանությունները լսել և հասկացել են ժողովրդի ուղերձը և պատրաստ են իրականացնել հանրության պահանջները: Դրանից պարզ կդառնա նաև, թե ինչ համաձայնություններ են կայացել իշխանության և քաղաքական տարբեր ուժերի միջև:
Վերջապես, շատ բան է կախված նրանից, թե քաղաքական ուժերից յուրաքանչյուրը ինչ պատասխանատվություն կվերցնի, ինչ ընտրարշավ կիրականացնի և ինչքանով պատրաստ կլինի վեր կանգնելու նեղ շահերից՝ հանուն ընդհանուրի և երկրի ապագայի:
Ահավասիկ, եթե այսքանից հետո կան մարդիկ, որ կասեն՝ այս ընտրությունները քաղաքական չեն, նշանակում է, որ նրանք կա՛մ թյուրիմացության մեջ են, կա՛մ էլ միտումնավոր թյուրիմացության մեջ են գցում հանրությանը:
Ավելին, այսօր մեր առջև ծառացած խնդիրների և ձախողումների պատճառները հիմնականում երկուսն են, և ես շատ ուրախ եմ, որ արդեն բոլորս ենք խոսում այդ մասին:
Առաջինը քաղաքական մենաշնորհն է: Մեկ կուսակցություն բացարձակ մեծամասնություն ունի ամեն ինչում: Նույնիսկ տպավորություն կա, որ որոշ գործիչներ Հայաստանը համարում են իրենց սեփականությունը՝ ժառանգած իրենց պապերից և պատրաստ հանձնելու իրենց հաջորդներին: «Միայն իրենք կարող են ղեկավարել երկիրը, միայն իրենք են հայրենասերները, միայն իրենք են հասկանում երկրի դարդ ու ցավը: Ովքե՞ր են մնացած բոլորը, ի՞նչ իրավունքով են հավակնում պաշտոնների, ի՞նչ հանդգնությամբ»:
Երկրորդը իշխանության և պետության նույնացումն է: Պետական կառույցները ժողովրդին ծառայելու փոխարեն ծառայում են իշխանության պահպանմանն ու վերարտադրությանը:
Ահավասիկ, այս մտածողությունն ու ոճն է, որ մեզ հասցրել է անդունդի եզրին: Այսպես պարզապես հնարավոր չէ շարունակել: Կարծում եմ՝ ժողովուրդը շռնդալից ձևով իր այդ ցանկությունն արտահայտեց նախագահական ընտրությունների ժամանակ:
Երկրում քաղաքական մենաշնորհը և ամենաթողությունը վերացնելու մեր ամենամոտ հաջորդ հնարավորությունը մայիսի սկզբին Երևան քաղաքի ավագանու ընտրություներն են:
Երկիրը ճակատագրական ջրբաժանի առաջ է՝ ոչ թե գոյության կամ չգոյության, այլ ճահճում մնալու կամ դրանից դուրս գալու առումով: Այսօր պատասխանատվություն վերցնելու ժամանակն է, և այստեղ «Բարգավաճ Հայաստան» կուսակցությունը հստակ առաքելություն ունի: Այն Հայաստանի քաղաքական դաշտի առանցքային բևեռներից է և իր գաղափարական, ծրագրային, կադրային ու կազմակերպչական ներուժով շարունակելու է իսկական այլընտրանք մնալ գործող իշխանությանը, լինելու է ժողովրդի կողքին՝ նպաստելով սահմանադրական ճանապարհով նրա իրավունքների իրացմանը, լինելու է երկրում քաղաքական ուժերի լայն կոնսոլիդացիայի գլխավոր ջատագովներից և ակտիվ ներգրավվածություն է ունենալու քաղաքական բոլոր գործընթացներին՝ խորհրդարանական և արտախորհրդարանական, մասնակցելու է ազգային-քաղաքական նոր օրակարգի ձևավորմանը և դրա միջոցով երկրում իրավիճակի փոփոխությանը:
Չէի ցանկանա տպավորություն թողնել, որ ԲՀԿ-ն ձգտում է վերցնել Երևանի իշխանությունը միմիայն քաղաքական խնդիր լուծելու համար: Այդպես կլիներ, եթե ամեն ինչ բարվոք լիներ մեր քաղաքում: Բայց դժբախտաբար այդպես չէ: ԲՀԿ-ն լուրջ ծրագիր ունի լուծելու երևանցիների առջև ծառացած և տարիներով լուծում չստացած խնդիրները:
Գործունեության յուրաքանչյուր ոլորտ՝ լինի արտաքին քաղաքականություն, թե քաղաքի կառավարում, անհրաժեշտ է, որ ունենա գաղափարական հենք, որը խարիսխ լինի ոլորտում արդյունավետ գործունեություն ծավալելու համար: Ի՞նչը կարող է լինել այդ խարիսխը քաղաքի դեպքում, որը լինի քաղաքապետի և ավագանու գործունեության գլխավոր ուղենիշը:
Ամեն ինչ հանգում է անհատին ու հասարակությանը ծառայելուն: Իսկ անհատին ծառայելու նպատակը պետք է լինի նրա համար արժանապատիվ կյանք ապահովելը: Այս բառն իր բովանդակությամբ այնքան ընդգրկուն է, որ ներառում է առօրյա կյանքի բոլոր ոլորտները:
Ես չէի ուզենա շատ խորանալ այսօր այդ հարցերի մեջ: Նրանք նշված են մեր ծրագրում, և բնականաբար մենք կխոսենք դրանց մասին ընտրարշավի ընթացքում:
«Բարգավաճ Հայաստան» կուսակցությունը երկու կարգախոս է ընտրել՝ «ՓՈԽԵԼՈՒ ԵՆՔ» և «ՍԿՍԵՆՔ ԵՐԵՎԱՆԻՑ». երկուսն էլ բազմաբովանդակ են և վերաբերում են մեր առօրյա կյանքին, քաղաքին, քաղաքացուն, անհատի զարգացմանն ու արժանապատվությանը: Այս ամենը հնարավոր կլինի միայն ընտրություններին քաղաքացիների ակտիվ մասնակցությամբ: Սա իսկապես հնարավորություն է երկրում և մարդկանց կյանքում իրավիճակ փոխելու համար:
Վարդան Օսկանյանի գրասենյակ
