Հայաստանի պետական երիտասարդական նվագախումբը համերգային ծրագրով Եղեգնաձորում էր
Երեկ «Եղեգնաձորի «Մշակույթի կենտրոնում» Հայաստանի պետական երիտասարդական նվագախումբը, Հայաստանում Ամերիկայի Միացյալ Նահանգների դեսպանատան աջակցությամբ, Եղեգնաձորի հանդիսատեսին նվիրեց «Երիտասարդները երիտասարդների համար. Hollywood Non-Stop» բացառիկ համերգային ծրագիրը: ՀՊԵՆ-ն, գեղարվեստական ղեկավար եւ գլխավոր դիրիժոր Սերգեյ Սմբատյանի գլխավորությամբ, Եղեգնաձորի ուսանողների, ուսուցիչների եւ մշակույթի ոլորտի ներկայացուցիչների առաջ հանդես եկավ հոլիվուդյան կինոարվեստի գլուխգործոց-ֆիլմերի երաժշտության կատարմամբ:
«Եղեգնաձորի մշակույթի կենտրոնի» տնօրեն Մարո Սիմոնյանը Aravot.am-ի հետ զրույցում նշեց, որ համերգն ինքնին աննախադեպ է. «Ճիշտ է, մեզ մոտ ելույթ են ունեցել կամերային նվագախմբեր, բայց սա առաջին դեպքն է, երբ սիմֆոնիկ նվագախումբ է գալիս Եղեգնաձոր: Սա շատ լուրջ մշակութային իրադարձություն է: Շատերի համար այն լավ առիթ է` առանց Երևան գնալու համերգ լսելու համար Եղեգնաձորցիները բավական մշակութասեր են եւ լավ ունկնդիր»:
Կարդացեք նաև
Տիկին Սիմոնյանի համոզմամբ. «Համերգային ծրագրի կատարումները մատչելի են, որովհետեւ հայտնի ֆիլմերը բոլորն են նայել եւ նայում»:
Հանդիսատեսին ողջունեց Վայոց ձորի մարզպետ Էդգար Ղազարյանը` ասելով, որ այս նախաձեռնությամբ նվագախումբը նպատակ ունի դասական երաժշտությունը տարածել հայ հասարակության շրջանում. «Դասական երաժշտության արժեքները հետագայում մեզանից յուրաքանչյուրն արդեն իր ուժերով է զարգացնելու»:
Ներկաներին ողջունեց նաեւ ԱՄՆ դեսպանատան մշակութային կցորդ Շոն Օ’Հարան` հայտնելով, որ ԱՄՆ դեսպանատունն ուրախ է համագործակցել Հայաստանի պետական երիտասարդական նվագախմբի հետ:
Համերգից հետո Սերգեյ Սմբատյանը լրագրողների հետ զրույցում փաստեց, որ «Երիտասարդները երիտասարդների համար. Hollywood Non-Stop» ծրագիրը արդյունավետ է եւ ոգևորիչ. «Վստահ եմ, որ այն մեծ հաջողություն կունենա»:
Սերգեյ Սմբատյանը նշեց, որ Hollywood Non-Stop-ը շարունակական բնույթ է կրում. Հայաստանի պետական երիտասարդական նվագախմբի հաջորդ կանգառն Արտաշատում է:
Եղեգնաձորի հանդիսատեսը նվագախմբի անդամներին ճանապարհեց հոտնկայս ծափահարություններով:
Լուիզա ՍՈՒՔԻԱՍՅԱՆ
Հրաշալի գործ են անում։ Մարզերի ժողովուրդը գոնե այսպես կշփվեն բարձր արվեստի հետ։