ՕԵԿ նախագահ, ԱԽ քարտուղար Արթուր Բաղդասարյանը անընդունելի է համարում ապրիլի 9-ին նախատեսված «Նոր Հայաստանի» երդմնակալությունը:
«Այդ մոտեցումները համարում եմ անընդունելի, որովհետեւ տեղի են ունեցել ընտրություններ, որոնք ավարտվել են: Հնչել են կոնկրետ գնահատականներ: Ընտրությունների արդյունքում երկրում ձեւավորել վտանգավոր նախադեպ, երբ ընտրության արդյունքից դժգոհ որեւէ թեկնածու կարող է իրեն հռչակել երկրի նախագահ, թագավոր, ընդունելի չէ: Պարոն Հովհաննիսյանը կրկնեց այն, ինչ տեղի ունեցավ 2008-ին, երբ Ազատության հրապարակից իրենց հռչակեցին նախագահ ու սկսեցին նշանակել նախարարներ: Այնուհետեւ մեկ ամիս անց պարոն Հովհաննիսյանն ասաց՝ պատրաստ եմ ճանաչել Սերժ Սարգսյանի նախագահությունը, եթե ինձ տրամադրեք 8 կարեւոր պաշտոններ: Մինչ այդ չէր ճանաչում Սերժ Սարգսյանի նախագահությունը, բայց 8 պաշտոնների դիմաց նա պատրաստակամություն հայտնեց ճանաչել Սերժ Սարգսյանի նախագահությունը»,- այսօր ՕԵԿ կենտրոնական գրասենյակում ասուլիսի ժամանակ ասաց պարոն Բաղդասարյանը:
Նա տրամաբանություն չի տեսնում պարոն Հովհաննիսյանի պահանջների մեջ. «Առողջ տրամաբանությւոնը հուշում է կատարել ճիշտ վերլուծություններ: Չի կարելի կառավարությունը իշխանությունը մասնատել մի քանի մասի: Այսինքն պարոն Հովհաննիսյանը, երբ պահանջեց մաքսային, հարկային ծառայության եւ այլ բարձրաստիճան պաշտոններ, չի կարող լինել այնպես, որ հարկ հավաքողները լինեն ընդդիմության ներկայացուցիչները, իսկ թոշակ բաժանողները իշխանության ներկայացուցիչները: Նման պահանջները իրավական հիմնավորում չունեն»:
Պարոն Բաղդասարյանը իրավիճակի երեք հանգուցալուծում է տեսնում.
Կարդացեք նաև
«Առաջին՝ պարոն Հովհաննիսյանը չի ճանաչում ընտրությունների արդյունքները եւ շարունակում է իր պայքարը փողոցներում, հրապարակներում՝ չճանաչելով ձեւավորված իշխանության լեգիտիմությունը եւ իր պայքարը տանում է այդ շրջանակներում: Երկրորդ՝ նա ճանաչում է ընտրությունների արդյունքները, իրեն հռչակում է ընդդիմադիր առաջնորդ եւ փորձում է կոնսոլիդացնել քաղաքական դաշտը եւ երրորդ՝ նա քաղաքական համագործակցության եզրեր է փնտրում իշխանությունների հետ եւ ձեւավորում է համագործակցության ֆորմատ: Կա եւս մի տարբերակ, որ պարոն Հովհաննիսյանը կարող է ակնկալել որոշակի վերահսկողական լծակներ հանրային դաշտում՝ վերահսկելու իշխանությունների աշխատանքը… Չի կարելի լինել ընդդիմություն եւ միաժամանակ լինել իշխանության մեջ: Սա հակասում է պրակտիկային»:
Արփինե ՍԻՄՈՆՅԱՆ
Ախր քեզ համար տրամաբանականը մի բան է,հայ մարդու համար մի այլ բան: