Մեր մեծերի հոբելյանները միշտ չէ, որ «միջազգայնացվում են»: Այս տարի լրանում է Արամ Խաչատրյանի ծննդյան 110- ամյակը: ՀՀ կառավարությունը միջոցառումների ողջ ծրագիրը շրջանակել է միայն մեր պետության սահմանները: «Առավոտի» հետ հանդիպման ժամանակ իտալացի ճանաչված ֆլեյտահար, Եվրոպական փառատոնային ասոցիացիայի փոխնախագահ Մասիմո Մերչելին (լուսանկարում) տեղեկանալով, որ այս տարի Խաչատրյանի հոբելյանն է, նախ նշեց, թե իրենց կազմակերպությունը տարվա ընթացքում անցկացնում է 90 փառատոն եւ կոմպոզիտոր Ստեփան Ռոստոմյանի դասական երաժշտության Երեւանյան միջազգային փառատոնն էլ ասոցիացիայի անդամ է: Ապա ափսոսանք հայտնեց, ասելով. «Եթե մենք նախապես տեղեկացված լինեինք Խաչատրյանի հոբելյանի մասին, բնականաբար, փառատոներից մեկը կնվիրեինք հայ կոմպոզիտորին, օրինակ՝ հենց մոտ ժամանակներս Բուդապեշտում մեկնարկելիք միջոցառումը»: Մտորելու խնդիր է՝ մե՞նք պետք է Եվրոպային հուշեինք, որ Խաչատրյանը համաշխարհային մեծության դասական է, թե՞, այնուամենայնիվ, ասոցիացիան պետք է իմանար հոբելյանի մասին:
Երեկ «Արամ Խաչատրյան» համերգասրահում Մասիմո Մերչելին Հայաստանի պետական ֆիլհարմոնիկ նվագախմբի հետ, դիրիժոր Էդուարդ Թոփչյանի ղեկավարությամբ, 106-րդ անգամ հնչեցրեց Ջովանի Սոլիմանիի «Կոնտրաֆակտուսը»: Երաժիշտն ասաց, որ շուրջ 35 տարի անց սա իր երկրորդ այցն է Հայաստան, նկատելով, որ թեեւ այսօր Երեւանի, կոնկրետ՝ կենտրոնի ընդհանուր տեսքը փոխված է՝ նմանվելով եվրոպական երկրների, սակայն ինչպես առաջին այցի ժամանակ, հիմա էլ չի փոխվել հայ մարդու ջերմությունն ու ընդունելությունը:
Մեր զրուցակիցը նշեց, որ կարիերայի սկզբից մշտապես անպակաս է եղել շփումը հայ երաժիշտների հետ: «Հայերիդ միայն յան-ով ավարտվող ազգանունով միանգամից տարբերակում ես այլազգիներից: Մինչ 2001թ. հյուրախաղերի ընթացքում եւ այդ թվականից հետո, երբ անդամագրվեցի Եվրոպական փառատոնային ասոցիացիային, ավելի հաճախ դարձավ շփումս հայազգի եւ Հայաստանից դուրս ապրող տաղանդավոր հայ արվեստագետների հետ: Սակայն այս պահին ուզում եմ հիշատակել Յուրի Բաշմետի, Քշիշտոֆ Պենդերեցկու, Ֆեդերիկո Մոնդելչիի, Չեչիլիա Գաստիայի, Ժան-Պիեռ Ռամպալի եւ, իհարկե, ծագումով հայուհի, ծնունդով Իտալիայից անվանի տավղահարուհի Սյուզան Միլիդոնյանի անունները, որոնց հետ համագործակցության արդյունքում ունեցել եմ հիշարժան համերգներ»,- հայտնեց Մերչելին:
«Մոսկվայի մենակատարներ», Վիեննայի սիմֆոնիկ, Եվրամիության կամերային, «Լա Սկալա», Հռոմի օպերային թատրոնների եւ այլ ճանաչված նվագախմբերի հետ բազմիցս ելույթ ունեցած երաժշտից կարծիք խնդրեցինք մեր ֆիլհարմոնիկ նվագախմբի մասին: «Թոփչյանի հետ ունենք ընդհանուր ընկեր, ով ժամանակին ինձ էր տրամադրել Հայաստանի ֆիլհարմոնիկի տեսագրությունները,- նշեց Մերչելին, ժպիտով հավելելով,- եթե այստեղ եմ՝ ուրեմն լավ կարծիքի եմ ձեր նվագախմբի մասին»: Ռեպլիկին՝ հնարավո՞ր է Եվրոպական փառատոնային ասոցիացիան երբեւէ կազմակերպի նաեւ հայաստանյան նվագախմբերի, օրինակ՝ արդեն ձեզ ծանոթ ֆիլհարմոնիկի հյուրախաղերը, ասոցիացիայի փոխնախագահի պատասխանը հակիրճ էր. «Կմտածեմ այդ ուղղությամբ»:
Կարդացեք նաև
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
