ԵՊՀ-ի Բանասիրության ֆակուլտետի դահլիճում այսօր տեղի ունեցավ Համազգային հայ կրթական և մշակութային միության, Երևանի պետական համալսարանի և Հայաստանի Գրողների միության հետ միասին համատեղ երկօրյա գիտաժողով` ժամանակակից հայ արձակի հիմնախնդիրները թեմայով:
Գիտաժողովի ընթացքում հնչեցին զեկույցներ տարբեր թեմաներով. Դավիթ Գասպարյան՝ «Ժամանակակից իրականությունը և ժամանակակից հայ արձակը», Ալիս Հովհաննիսյան՝ «Հետանկախացման շրջանի հայ արձակի որոշ ֆենոմեններ», Յակոբ Պալեան՝ «Սփյուռքահայ արձակ, խնդիրներ», Վահրամ Դանիելյան՝ «Վարկածներ վեպի մասին» և այլք:
ԵՊՀ Հայ բանասիրության ֆակուլտետի դեկան Արծրուն Ավագյանը նշեց. «Դժվար է ասել, դժվար է գնահատել, ի՞նչ ասել է գրականություն: Տասնյակ բնութագրեր կարելի է ասել և դրանցից ոչ մեկը սպառողական չի կարող լինել, վերջնական չի կարող լինել: Մեր փոքր ազգի համար գրականությունը նախևառաջ ոգի է, ճշմարտություն, գաղափար, գեղեցիկի պրոպագանդում և պատգամի հաղորդման միջոց»:
Համազգային հիմնադրամի նախագահ Լիլիթ Գալստյանն ասաց, որ արդեն 6-րդ անգամ է, որ նմանատիպ գիտաժողովներ են անցկացվում: Այս անգամ պետք է փորձեն քննել արդի հայ արձակի հիմնախնդիրները: Գրականությունն այն պաշարն է, որ ճանաչելու դռներն է բացում:
Կարդացեք նաև
Գիտական նստաշրջանները` նվիրված գրականության ազգային մեծերի, մշակութային գործիչների վաստակին, գործունեությանը` թույլ են տալիս նրանց աշխատանքների մասին խոսել, զեկուցումներ լսել, քննարկումներ անցկացնել, կարծիքներ փոխանակել, որոնք ի վերջո դառնում են գիրք: Եվ ինչպես պրն Ավագյանը նշեց, այսօր շնորհիվ Համազգային հիմնադրամի նախագահ Լիլիթ Գալստյանի՝ այդ բոլոր գրքերն իրենց սեղանների վրա են:
Արծրուն Ավագյանը նաև հավելեց. «Եթե մենք շատ թե քիչ ծանոթ ենք մեր դասական գրականությանը, ապա ընթացիկ գրականության մասին այնքան էլ լավատեղյակ չենք: Քիչ ենք ընթերցում՝ օբյեկտիվ և սուբյեկտիվ պատճառներով: Սուբյեկտիվը մեր սոցիալական վիճակն է: Օբյեկտիվը` գուցե այսօրվա տեխնիկական այն հաղորդակցման միջոցները, որ գրեթե ամեն մարդ ունի և ինքը շատ ավելի հեշտությամբ կարողանում է բացել ինչ-որ կայքի էջ ու ընթերցել»:
Հայաստանի Գրողների միության նախագահ Լևոն Անանյանը հավելեց. «Վերջին ժամանակներս ժամանակակից գրականությունը`արձակը, ուշադրության կենտրոն է տեղափոխվել, որն էլ ողջունելի է»:
Արմինե ՀԱՄԲԱՐՁՈՒՄՅԱՆ
