Ապրիլի 3-ին ՀՀ հանրային խորհրդի նախագահ Վազգեն Մանուկյանի հետ էին
հանդիպել Հայկական ազգային ավիափոխադրող «Արմավիա» ընկերության
օդաչուներ՝ ներկայացնելով իրենց մտահոգությունը «Արմավիա»-ի ներկա
իրավիճակի վերաբերյալ և քննարկելով դրա հետևանքները օդաչուների հետագա
գործունեության վրա:
ՀԽ նախագահն առաջարկել էր «Արմավիա» ընկերության շուրջ ստեղծված
իրավիճակի, հայ օդաչուների խնդիրների և ընդհանրապես Հայաստանի
քաղավիացիայի ապագայի վերաբերյալ կազմակերպել քննարկում՝ շահագրգիռ
բոլոր կառույցների ներկայացուցիչների մասնակցությամբ:
Քննարկումը տեղի կունենա ապրիլի 11-ին, որի վերաբերյալ լրացուցիչ կտրվի
տեղեկատվություն:
Այսօր Հանրային խորհրդի օդային տրանսպորտի քաղաքականության հարցերի
ենթահանձնաժողովում քննարկման նախապատրաստական նիստ է տեղի ունեցել, որի
ընթացքում կրկին բարձրացվել են «Արմավիա» ընկերության ներկա իրավիճակին,
Հայաստանի քաղավիացիայի խնդիրներին և հետագա ճակատագրին առնչվող հարցեր:
Կարդացեք նաև
Քննարկվել են «Արմավիայի» սնանկացման պատճառներն ու հետևանքները, հնչել
են Հայաստանի քաղավիացիայի զարգացման վերաբերյալ մի շարք առաջարկներ:
Ենթաhանձնաժողովի նախագահ, ԽՍՀՄ վաստակավոր օդաչու Դմիտրի Ադբաշյանն
անդրադարձել է քաղավիացիայի ոլորտի օրենսդրությանը՝ մատնանշելով օրենքում
առկա բացերը:
Նա անհրաժեշտ է համարել Հայաստանի Հանրապետության օդային օրենսգրքի
ընդունումը, երկրի քաղավիացիան փրկելու ազգային ծրագրի մշակումն, ինչպես
նաև այդ ծրագրի իրականցման վրա հասարակական վերահսկողության սահմանումը:
Ադբաշյանը ներկաների ուշադրությունը հրավիրել է այն հանգամանքի վրա, որ
այսօր ազգային ավիափոխադրողի շուրջ ստեղծված իրավիճակի համար որևէ
կառույց պատասխանատվություն չի կրում: Այդ փաստը նույնպես նա համարել է
օրենսդրության թերի լինելու հետևանք:
Ենթահանձնաժողովի անդամները հստակեցրել են այն հարցերն ու առաջարկները,
որոնք պետք է ներկայացվեն ապրիլի 11-ին կայանալիք քննարկման ընթացքում:
ՀՀ Հանրային խորհրդի մամուլի պատասխանատու
Անի Գասպարյան
