Վեճին միջամտեց Րաֆֆի Հովհաննիսյանը:
Այսօր առավոտյան ժամը 10.30 Րաֆֆի Հովհաննիսյանի հանդիպումն էր նախատեսված Նոր Հաճընում: Սակայն հանդիպման վայրում այդ ժամին մատների վրա հաշված մարդիկ էին: Փառանձեմ մայրիկը, տեսնելով քիչ թվով մարդկանց, սկսեց «Ժառանգության» տարածքային կառույցի պատասխանատուին՝ Համլետ Գեւորգյանին շշպռել, թե «սաղ քո պատճառով ա, որ չեն եկել մարդիկ, ոչ մեկին էլ չես ասել: Դավաճան ես, աշխատում ես Րաֆֆի Հովհաննիսյանի դեմ»:
Վերջինս էլ սկսեց վիրավորել Փառանձեմ մայրիկին: Բանը հասավ նրան, որ միմյանց Նոր Հաճընի կենտրոնում էլ «պառավ շուն», էլ «դավաճան, անամոթ ու այլասերված» ասեցին:
Կարդացեք նաև
Համլետ Գեւորգյանը Aravot.am-ի հետ զրույցում վստահեցրեց, որ ինքը Նոր Հաճընում բոլորին զգուշացրել է, ուղղակի այսօր երկու թաղում կա, մարդիկ թաղում են գնացել, խառն են, մի քիչ հետո անպայման կգան: Նա հիշեցրեց, որ Նոր Հաճընում Րաֆֆի Հովհաննիսյանը մի քանի հանդիպում է ունեցել եւ բոլորն էլ բազմամարդ են եղել:
Փառանձեմ մայրիկի եւ ժառանգականի վեճին միջամտեց Րաֆֆի Հովհաննիսյանը: Պատասխանելով Փառանձեմ մայրիկի բողոքին, որ Համլետ Գեւորգյանը ոչ մեկին չի ասել, մարդ չի եկել հանդիպման՝ Րաֆֆի Հովհաննիսյանը հանգստացրեց նրան. «Բան չկա, ժողովուրդ կա: Ժողովուրդը տեղյակ է, որ հաղթել է: Կարեւորը դա է»:
Ընդամենը 10 րոպե հետո Նոր Հաճընի հրապարակն իսկապես դարձավ բազմամարդ:
Հռիփսիմե ՋԵԲԵՋՅԱՆ
