Նա երկնչում էր իրեն կողոպտածի դեմ ցուցմունք տալ:
Ապրիլի 2-ին Իջեւանում, Տավուշի մարզի առաջին ատյանի դատարանում կայացավ Սամվել Պապյանի դատավարության առաջին նիստը:
Դիլիջան քաղաքի բնակիչ, 1966թ. ծնված Ս. Պապյանը մեղադրվում է այն բանում, որ 2013թ. հունվարի 19-ին, ժամը 17-ի սահմաններում Դիլիջանի բնակիչ Սերգեյ Ռուդամյոտկինին պատկանող «Ֆորդ Մոնդեո» ավտոմեքենայում դիլիջանցի Գագիկ Ղազարյանի գույքին տիրանալու նպատակով բացահայտ հափշտակել է վերջինիս պատկանող ոսկյա մատանին, ձեռքի ժամացույցը եւ «Նոկիա» ֆիրմայի բջջային հեռախոսը, նրան պատճառելով 168 հազար դրամի վնաս:
Նախկինում դատված Ս. Պապյանին մեղադրանք է առաջադրվել ՀՀ քրեական օրենսգրքի 176 հոդվածի 1-ին մասով ( «Կողոպուտ»): Ամբաստանյալը իրեն մեղավոր չհամարեց, հայտարարելով, որ այդ գործով ինքն է տուժողը: Նրան պաշտպանում է հանրային պաշտպանի գրասենյակի փաստաբան Կարեն Ղալումյանը:
Կարդացեք նաև
Վերջինիս միջնորդությամբ դատարանն ամբաստանյալի երկու քույրերին ներգրավեց որպես վկաներ: Տուժող 42-ամյա Գագիկ Ղազարյանը դատարան էր եկել սպորտային անխնամ հագուստով: Նա դատարանում անհավասարակշիռ պահվածք ուներ, շարունակ իր գլուխը բռնելով ասում էր՝ «էս ինչ կրակի մեջ եմ ընկել»: Դատավոր Ռաֆիկ Մելքոնյանի այն հարցին, թե ճանաչո՞ւմ է արդյոք ամբաստանյալին, տուժողն ասաց, որ նրան ճանաչում է որպես «շնորհքով» դիլիջանցի: Դատավորը նրան կոչ արեց ուշադիր լինել, մեղադրողը՝ Տավուշի մարզի դատախազության դատախազ Արարատ Ազիբեկյանը Գագիկին ասաց, որ նա «խմած է»»:
Փաստաբան Ղալումյանի հարցին պատասխանելով՝ Գ. Ղազարյանն ասաց, որ ինքն ամեն օր «խմում է»: Դատավորի հարցերին պատասխանելիս Գագիկը շարունակ ասում էր՝ ««հա ջան»: Նա դատարանում հայտարարեց, որ բողոք չունի, միայն թե վերադարձվի իր «ապրանքը»»: Նա դժկամությամբ էր ցուցմունք տալիս, ասելով,որ չի բողոքում: Դատավորը հիշեցրեց, որ նա արդեն բողոքել է, որի հետեւանքով ամբաստանյալը կալանքի տակ է: Գ. Ղազարյանը չէր կարողանում հանգիստ մնալ, ասում էր՝ «սիրտս վատ է, ճնշում ունեմ»: Դատավորը հայտարարեց 15 րոպե ընդմիջում:
Հետո ամբաստանյալը հայտարարեց, որ տուժողը ստում է, նա իր կամոք է տվել ժամացույցն ու հեռախոսը, որ հետագայում ինքը մի ճաշարանում սնվելով՝ ժամացույցը գրավ է թողել: Դատավորը նկատի ունենալով, որ տուժողի դատաքննական եւ նախաքննական ցուցմունքների մեջ հակասություններ կան, հրապարակեց նրա նախաքննական ցուցմունքները; Նախաքննության ժամանակ տուժողը ցուցմունք էր տվել ,որ Ս. Պապյանի եւ մեկ այլ անձի հետ տաքսիով Դիլիջանից Իջեւան են գնացել: Վերադարձի ճանապարհին Պապյանն ասել է, որ Գագիկի փեսան իրեն գումար է պարտք: Գագիկն ասել է, որ իր փեսան պարտք չէ, եթե նույնիսկ պարտք է, ինքը դրա հետ գործ չունի: Ս. Պապյանն ասել, է, որ ոչ միայն փեսան է պարտք, այլ նաեւ՝ Գագիկը, քանի որ երբ ինքն ազատազրկման վայրում էր, նա իր համար ծխախոտ չի բերել ու Գագիկի ձեռքից հանել է մատանին,ժամացույցը, խլել հեռախոսը: Այս գործով հաջորդ դատական նիստը նշանակված է ապրիլի 5-ին:
Ոսկան ՍԱՐԳՍՅԱՆ
