Այսօր «Ընտանեկան բռնությունը Հայաստանում, դրա հիմնական պատճառները եւ կանխարգելման ուղիները» թեմայով ասուլիս էր հրավիրված «Նոյյան տապան» ակումբում, սակայն ասուլիսին ներկա էին ընդամենը 3-4 լրատվամիջոցներ: Ասուլիսի մասնակիցներ՝ «Կանանց իրավունքների կենտրոնն ընդդեմ կանանց նկատմամբ բռնության» ցանցի ներկայացուցիչները տեսնելով, որ փոքր թվով լրատվամիջոցներ են ներկա, սկզբում մտադիր էին բոյկոտել ասուլիսը` ասելով` նման կարեւոր խնդիրը ինչպե՞ս չի հետաքրքրում լրատվամիջոցներին: Ներկա լրագրողների այն հորդորին, որ եթե ասելիք ունեք, ուրեմն եղած լրագրողների համար խոսեք, ցանցի համակարգող Սաթենիկ Գեւորգյանն ասաց, որ ասելիք շատ ունեն:
Սակայն, երբ հերթը հասավ լրագրողների հարցերին, մեր գրեթե բոլոր հարցերին ցանցի ներկայացուցիչները ոչ լիարժեք պատասխաններ տվեցին: Օրինակ, երբ Aravot.am-ը հետաքրքրվեց, թե ըստ իրենց, ինչո՞ւ կառավարությունը մերժեց ընտանեկան բռնության մասին օրենքի նախագիծը, արդյոք այն արդիական չէ, ցանցի համակարգողն ընդամենն ասաց. «Դե գիտեք, էդ մասին շատ է խոսացվել, ես իրավասու չեմ այս պահին այդ մասին խոսել: Սուսաննա Վարդանյանը բազմիցս խոսել է այդ մասին»:
Մեր խնդրանքին՝ ներկայացնել ընտանեկան կամ կանանց նկատմամբ բռնության որեւէ ցնցող դեպք, որից հետո դիմել են իրենց կենտրոն, ասուլիսի մասնակիցները չկարողացան հիշել որեէ դեպք, նշելով, որ դեպքերը շատ-շատ են:
Մեր մյուս հարցին էլ, թե ըստ կենտրոնի տվյալների, հայ տղամարդն ավելի շատ բռնության ո՞ր միջոցն է կիրառում, Սաթենիկ Գեւորգյանն ասաց. «Հայ տղամարդիկ ամեն ինչ էլ անում են, բայց ստատիստիկան ցույց է տալիս, որ ֆիզիկական եւ հոգեբանական բռնությունները մեծ մաս են կազմում եւ ինչու չէ` սեռական եւ տնտեսական»:
Կարդացեք նաև
Նելլի ԲԱԲԱՅԱՆ
