ՀՀԿ-ական Գագիկ Մինասյանի համոզմամբ, եթե Րաֆֆի Հովհաննիսյանը կարողանար իրացնել նախագահական ընտրություններում ձեռքբերածը, քաղաքական դաշտում նոր լիդեր կունենայինք:
«Ցավոք դա տեղի չունեցավ, իհարկե, դա հեշտ խնդիր չէր: Այսօր մենք ականատես ենք մի իրավիճակի, երբ քաղաքական դաշտում հնչում են հայտարարություններ, որոնք ընկալելի չեն ոչ միայն քաղաքական մյուս ուժերի, այլեւ՝ շատ հաճախ իր զինակիցների համար: Բոլորը սպասում են, թե ինչ պետք է ասի հերթական անգամ պարոն Հովհաննիսյանը: Համաձայնեք, որ սա բնական կարգավիճակ չէ: Քաղաքական ուժն ու լիդերը հրապարակում են իր ծրագրերը հանրությանը քաղաքական մյուս ուժերին տեղեկացնում, եւ սա է երաշխավորում տեւական հաջողությունների ընթացքը: Բայց այս դեպքում ամեն ինչ պայմանավորված է մի անձի ընկալումների շրջանակում ձեւավորված տեսակետից: Հասարակությունը երկար ժամանակ այդ կարգավիճակին համակերպվել չի կարող: Պետք է սպասենք մինչեւ ապրիլի 9-ը, որովհետեւ պարոն Հովհաննիսյանը ապրիլի 9-ը համարում է շրջադարձային օր՝ իր եւ շարժման համար…Այս պարագայում հանգուցալուծումն այն է, որ պարոն Հովհաննիսյանն իրականացնի այն հնարավորությունները, որոնք իրեն տրվել էր նախագահական ընտրությունների արդյունքում: Այն է՝ այդ մեծ, 37 տոկոսանոց կապիտալը դարձնի իր քաղաքական կապիտալը եւ չմսխի այդ կապիտալը, որովհետեւ մոտ ապագայում նաեւ ունենք ավագանու ընտրություններ»,-ասաց Գագիկ Մինասյանը:
Արփինե ՍԻՄՈՆՅԱՆ
