Այօր Նոր Հաճընում Րաֆֆի Հովհաննիսյանն անդրադառնալով մի քանի ԶԼՄ-ների հրապարակումներին՝ ասաց, որ միշտ կողմ է ազատ խոսքին, անգամ եթե այդ ազատ խոսքով իրեն են կպել՝ մեկ-մեկ ճիշտ, մեկ-մեկ սխալ: Բայց ուզում են նաեւ հարվածել իր ընտանիքի պատվին. «Չեն հաջողացնելու: Եթե դուք կեղտախոս, իրավախախտ պարոն Լիսկայի մեղսակիցն եք դառնում՝ մի շարք կեղծ հայրենապաշտներին զուգահեռ իմ հորը հարվածելու համար, այն հորը, որ պաշտպանել է հայոց իրավունքը, Հայ Դատը, մեր երկրի ամբողջականությունը, եթե սա մնում ձեզ այս վերջնախաղում՝ դուք որոշեք: Եթե դուք էլ ընտրախախտ մարզպետների ճամփան եք ուզում բռնել, խնդրեմ, ես ձեզ կպաշտպանեմ: Ինչ ուզում եք ասեք, բայց ով կրկնեց կեղծիքը, ինքը նույն դատարանի առջեւ՝ հայ ժողովրդի ճշմարտության դատարանի առջեւ պիտի կանգնի»:
Րաֆֆի Հովհաննիսյանը նաեւ հայտարարեց, որ այսօր լինելու է ամենախայտառակ եւ իրավախախտ մարզերից մեկում՝ Գեղարքունիքում. «Թող պարոն Լիսկայի փխրուն ոգին շատ չցավա, որ չկարողացավ ժամադրություն պահել ինձ հետ, գլուխ ջարդելու, մի քանի լեզվանի ուսուցիչ ուղարկեց՝ իր փողերի խաթր, թող տա: Բայց մենք մենակ չենք: Խեղճը չմտածի, որ մենակ իր մասին է խոսքը: Ամեն ինչ փոխվելու է վերից վար՝ Գեղարքունիքից սկսած: Գեղարքունիքի մարզպետը ով ասում էր՝ Րաֆֆին ո՞վ ա, որ ես իրան պատասխանեմ, ուզում է՝ թող ասի, բայց չհանդգնի նույնը ասել ժողովրդին: Որովհետեւ ժողովուրդն ասել է, թե ինքը ով է եւ ժողովուդն ով է: Եթե Սեւանի քաղաքապետը, իր ոստիկանապետով հանդերձ, մտել է խանութներ, տոնավաճառ, տներ եւ սպառնացել է ՀՀ քաղաքացուն, որ ինքը պիտի դուրս չգա, չմասնակցի հավաքին, այդ մարզպետը, այդ ոստիկանապետը բոլոր նման մարդկանց հետ մեկտեղ թող հայրենասիրական իրենց ճառերն իրենց պահեն: Իրենք ճաղերի հետեւում պիտի հայտնվեն՝ իրենց հակաժողովրդական պահվածքի համար: Պատրաստվե՛ք, մենք հիմա գալիս ենք Մարտունի եւ Սեւան»:
Հռիփսիմե ՋԵԲԵՋՅԱՆ
