«Աշխատանքային միգրացիայի սոցիալական հետեւանքները շատ հաճախ ուշադրությունից դուրս են: Չնայած փողի ներհոսքին, աշխատանքային միգրացիայի հետեւանքով ընտանիքի անդամները ենթարկվում են այնպիսի խոցելի գործոնների, ինչպիսիք են սոցիալ-հոգեբանական, սեռավարակակիր դառնալու եւ համապատասխան բուժում չստանալու խնդիրները, առողջապահական եւ կրթական ծառայությունների հասանելիության նվազումը, երեխաների բռնության եւ շահագործման ենթարկվելու վտանգը»,- այսօր «Մարիոթ» հյուրանոցում «Աշխատանքային միգրացիայի սոցիալական հետեւանքների մեղմացում եւ տեղական զարգացման գործընթացում միգրանտների ներգրավվածության մեծացում» ծրագրի շնորհանդեսի ժամանակ ասաց Հայաստանում ԵՄ պատվիրակության ղեկավար Տրայան Հրիսթեան:
Այս ծրագիրը Եվրամիության աջակցությամբ պետք է իրականացվի աշխատանքի եւ սոցիալական հարցերի, տարածքային կառավարման նախարարությունների հետ համատեղ:
Ըստ ԵՄ ներկայացուցիչների՝ տարիներ շարունակ աշխատանքային միգրացիան հանդիսացել է Հայաստանում ընտանիքների եւ համայնքների աղքատության, ինչպես նաեւ գործազրկության հետաւանքով առաջացած այլ խնդիրների հաղթահարման միջոց: Այնուամենայնիվ, աշխատանքային միգրացիայի բացասական հետեւանքները ընտանիքների, մասնավորապես՝ երեխաների ու կանանց վրա նշանակալից են եղել: «Աշխատանքային միգրացիան թե խնդիրներ եւ թե հնարավորություններ է առաջացնում ընտանիքների եւ համայնքների համար: Առանց հայրերի եւ ամուսինների մնացած երեխաներն ու կանայք տարբեր խնդիրների միջով են անցնում, ինչը հանգեցնում է ոչ պատշաճ ծնողական հմտությունների ձեւավորմանը, երեխաների՝ դպրոցից դուրս մնալուն, կանանց մոտ՝ սեռական ճանապարհով փոխանցվող հիվանդություններ ձեռք բերելու առավել մեծ ռիսկին: Մյուս կողմից, աշխատանքային միգրացիան կարող է եզակի հնարավորություն ներկայացնել համանյքների համար, քանի որ Հայաստանից դուրս միգրանտների ձեռք բերած հմտություններն ու գիտելիքները պատշաճ ձեւով կիրառվելու դեպքում կարող են նպաստել այդ համայնքների զարգացմանը»,- նշեց ՅՈՒՆԻՍԵՖ-ի տարածաշրջանային գրասենյակի փոխտնօրեն Քիրսի Մադին:
Ծրագրի ընդհանուր արժողությունը 1 մլն եվրո է: Այն, ըստ Եվրամիության պատվիրակության ղեկավարի, աջակցելու է ապօրինի միգրացիայի հետեւանքով արտերկրում հայտնված եւ վերադարձած միգրանտներին՝ վերաինտեգրվելու Հայաստանում: «Այս նոր նախաձեռնությունը կկենտրոնանա մասնավորապես միգրանտների մոտ առաջացած սոցիալական խնդիրների վրա»,- ասաց Տրայան Հրիսթեան:
Կարդացեք նաև
ՅՈՒՆԻՍԵՖ-ի կողմից ներկայումս իրականացվող «Հայաստանում աշխատանքային միգրացիայի սոցիալական արձագանք» ծրագիրը նպատակ ունի նվազեցնել Լոռու, Տավուշի, Գեղարքունիքի ու Շիրակի մարզերի աշխատանքային միգրանտների եւ նրանց համայնքների սոցիալական խնդիրները:
Լուսինե ԲՈՒԴԱՂՅԱՆ
