Գերմանահայերը վրդովված են. Բաց Նամակ

Մենք` Գերմանիայի Դաշնային Հանրապետությունում ապրող ՀՀ քաղաքացիներս և ծագումով հայ Գերմանիայի Հանրապետության քաղաքացիներս, մեր բողոքն ու անվստահությունն ենք արտահայտում Սերժ Սարգսյանին, ՀՀ ներկայիս կառավարությանն ու իշխանություններին, Հանրապետական Կուսակցությանը: Խորը վշտով փաստելով, որ չնայած արդար ու օրինական ընտրություններին ուղված մեր բազմաթիվ հայրենակիցների հետևողական ու անձնուրաց ջանքերի ՀՀ գործող իշխանությունները, Հանրապետական Կուսակցության և մի շարք այլ կուսակցությունների հովանավորության տակ գործող անհատները այնուամենայնիվ օգտագործելով պետական միջոցներ, վարչական ռեսուրսներ ու անօրինական մեթոդներ կեղծեցին ընտրությունների ընթացքն ու արդյունքները:
Հաշվի առնելով վերջին տարիների հետևյալ դառը նախադեպերը.

• Սյունիքի մարզպետ Սուրիկ Խաչատրյանի Երևանի կենտրոնում բացահայտորեն, տեսախցիկների առկայությամբ ապտակեց գործարար մի կնոջ ու անպատիժ մնաց ու շարունակում է պաշտոնավարել որպես մարզպետ

• Երևանի նախկին քաղաքապետ Գագիկ Բեգլարյանը ապտակեց ՀՀ նախագահի աշխատակազմի աշխատակցի ու կարճատև դադարից հետո նախարարի պաշտոն ստացավ

• Վահե Ավետյանին դաժանաբար սպանած հանցագործների մի մասը լկտիաբար ծաղրում է Ձեր իսկ „արդարադատությանը“, իսկ հանցագործների մյուս մասն ու նրանց հովանաորյալները բարգավաճում են ազատության մեջ

• 2008 թվի մարտի մեկի մարդասպաններն ու պաշտոնական դիրքը չարաշահած պաշտոնյաները պատասխանատվության չեն ենթարկվել, իսկ նրանց փոխարեն դատապարտվել ու դատապարտվում են իրավական բարձր գիտակցություն ունեցող ՀՀ օրինակելի քաղաքացիները

• մյուս անօրինություններին, այդ թվում նաև Ա1+ հեռուստաընկերությանը եթերից զրկելուն, քաջատեղյակ եք ինքներդ

փաստում ենք, որ Սերժ Սարգսյանի ու նրա իշխող թիմի անօրեն մի ստվար զանգված ոչ միայն ի վիճակի չէ ըստ էության իրավական պատասխանատվության ենթարկել վերոհիշյալ անօրեններին ու ՀՀ ընտրությունները կեղծողներին, այլ իրավական ապաստան ու անպատժելիություն է երաշխավորում նրանց:

Հիմնվելով վերոհիշյալ դառը իրականության ու փաստերի վրա դիմում ենք Սերժ Սարգսյանին.

Մի շարունակեք կործանել մեր ու մեր պապերի երազած պետությունն ու պետականությունը: Մեր բազմաչարչար Ժողովուրդը Սուրիկ Խաչատրյան, Գագիկ Բեգլարյան, Սերժ Սարգսյան չի ընտրել:

Մենք մեր զորակցությունն ենք հայտնում հայ ժողովրդին, Րաֆֆի Հովհաննիսյանին ու նրա շուրջ խմբված առողջ ուժերին:

Դր. Գնունի Կարապետյան

Գերմանիա, Դուսելդորֆ