ԽՍՀՄ վաստակավոր մարզիչ եւ Ռուսաստանի հավաքականի նախկին գլխավոր մարզիչ Անատոլի Բիշովեցը վստահ է, որ շնորհիվ վարպետության եւ ունիվերսալության, Հայաստանի ազգային հավաքականի եւ Դոնեցկի «Շախտյորի» կիսապաշտպան Հենրիխ Մխիթարյանը մեծ պահանջարկ ունի Ռուսաստանի պրեմյեր լիգայի առաջատար ակումբներում:
«Ես ուշադիր հետեւում եմ Հենրիխի մրցելույթներին եւ միայն գովեստի խոսքեր կարող եմ ասել նրա հասցեին: Մխիթարյանը խաղում է այն դիրքում, որտեղ այդպիսի ֆուտբոլիստի կարիք ունեն մեր առաջնության գրեթե բոլոր առաջատար ակումբները: Հայ կիսապաշտպանն ունիվերսալ է: Նա կարող է փակել հենակետային գոտին, հանդես գալ գրոհը եզրափակողի դերում, կատարել խաղարկողի պարտականությունները: Այդպիսիք մեր առաջնությունում շատ քիչ են: Թե ռուսական ակումբներից ո՞րը կհամապատասխանի Մխիթարյանին, դա կախված է նրանից, թե ով ֆինանսական մեծ հնարավորություններ ունի», – հայտարարել է լեգենդար ֆուտբոլիստը:
Աշոտ ՀԱԿՈԲՅԱՆ
