Այսօր Գյումրու Թատերական հրապարակում Րաֆֆի Հովհաննիսյանին ընդունեցին ծափահարություններով, ջերմագին խոսքերով, տատիկներից ոմանք էլ, տեսնելով նրան, բացականչեցին. «Մեռնիմ ջանիդ»:
«Ժառանգության» առաջնորդն էլ իր հերթին ելույթը սկսեց գյումրեցու ինքնասիրությունը շոյող խոսքերով: «Սիրելի հայրենակիցներ, Գյումրին ` Լենինականը, Շիրակ աշխարհը այնպես հաղթեց փետրվարի 18-ին, որ իրենք հիշեցին իրենց հոր հարսանիք: Հայրաքաղաքը իր պատգամը տվեց շատ հստակ, անգամ իշխանական տվյալներով` 70 տոկոս, իսկ իրականում, դուք գիտեք, Գյումրին , Շիրակը, և Հայաստանը ծայրից ծայր ինչ պատգամեց, ոչ թե Րաֆֆու հաղթանակ և Սերժի պարտություն, այլ Հայաստանի քաղաքացու, լեննագանցու թասիբի, մեր երեխաների ապագայի հաղթանակը, և այդ հաղթանակը մենք ամրագրելու ենք ապրիլի 9-ին` միասին», -ասաց Րաֆֆի Հովհաննիսյանը, որին ժողովուրդը արձագանքեց . «Բրավո» բացականչությամբ:
Նա նաև ասաց, որ եկել են հավաքագրելու բարևի, արևի ու հույսի բանակը, և պայքարը շարունակվելու է մինչև բոլոր երազանքների իրականացում: «Սիրելի քույրեր և եղբայրներ, այս վերջին երեք շաբաթները մի փոքր ձեր նման հաց չուտելով` ես հասկացա, թե մեր ժողովրդի կեսը, և սա կատակ չէ, ինչպես է ապրում մեր երկրում, իր հայրենիքում, իր քաղաքում»,- ասաց Րաֆֆի Հովհաննիսյանը` խոստանալով, որ ամեն ինչ անելու է, որպեսզի յուրաքանչյուր հայ ընտանիք օջախ ունենա, ապահովվի աշխատանքով, ունենա սեղանի հացը, երեխայի կոշիկը այդ մի կտոր հարստությունն ու արժանապատվությունը: «Սա շատ սովորական կազմակերպչական հանձնարարություն է , ոչ թե էժան խոստում: Ձեր ընտրյալները պետք է համեստ ապրեն, ոչ թե շռայլության մեջ: Դուք պետք է հարստանաք կամաց-կամաց` կենսաթոշակ, աշխատանք: Պետական ծառայողները նաև` ոստիկանից սկսած, պետք է ունենան նորմալ աշխատավարձ և արժանավայել կյանք, և երբեք չենթարկվեն անիրավ, կուսակցական, կեղծ հրահանգների»,-շարունակեց Րաֆֆի Հովհաննիսյանը:
Նա ասաց, որ առաջին փորձությունը ապրիլի 7-ն է, և հույս հայտնեց, որ ճանապարհները բաց կլինեն, քանի որ սա մեր երկիրն է, ոչ թե Օսմանյան կայսրությունը:
Կարդացեք նաև
Նա նաև նկատեց, որ աշխարհը պետք է հաշտվի փետրվարի 18-ի իրենց հաղթանակի հետ: Այնուհետ անդրադարձավ Պռոշյան գյուղի գյուղապետի սպանությանը: «Այսօր հայ ժողովուրդը կորցրեց նվիրական ազատամարտիկ, Պռոշյան գյուղի գյուղապետ , հպարտ մարդ, քաղաքացի, դաշնակցական, սպանեցին նրան օրը ցերեկով, վախկոտները: Մենք պահանջում ենք, որ գործող դե ֆակտո իշխանությունները ապրիլի 9-ին ընդառաջ բացահայտեն այդ քստմնելի ահաբեկչությունը , և հանկարծ չլինի, որ Սյունիքի, Գեղարքունիքի այլ սադրանքների ու բռնությունների, 18 թվականի, փետրվարի 18-ի համատարած ընտրախախտումների հետքերով, սա դառնա տեռորի, վախի, սպառնալիքի հերթական դրսևորումը: Պահանջում ենք ողջ ճշմարտությունը, որովհետև մենք դուրս ենք եկել սեփական վախից , և սպառնալիքից , իմ վրա եմ վերցնում դա, Աստված չանի, որ սա կրկնվի այլևս երբեք Հայաստան աշխարհում»:
Նա նաև ասաց, որ Բարևի հեղափոխության միլիոնավոր նվիրյալները, մասնակիցները երբեք ձեռք չեն բարձրացնելու հայ քաղաքացու, ոստիկանի և ուրիշ մեկի նկատմամաբ: «Եթե լինելու է , դա լինելու է մյուս մայթից, վախի, սպառնալիքի, ժողովրդից թաքցնելով ողջ ճշմարտությունը և ով ռիսկ արեց ձեռք բարձրացնել, դա անելու է իմ նկատմամբ առաջին հերթին»,- նախազգուշացրեց Րաֆֆի Հովհաննիսյանը:
Նա նաև ասաց, որ մեկ շաբաթ անց` ապրիլի 9-ին, ունենալու են նոր հռչակված Հայաստանի Հանրապետություն: «Ուռաա~», -բացականչեցին հավաքվածները: «Մտածեք, տղեք, պարոն Սարգսյան, մի շաբաթ մնաց»,- նորից կրկնեց Րաֆֆի Հովհաննիսյանը: Ըստ նրա, կունենան տնտեսական զարգացում, մաքուր բնություն, ժողովրդին պատկանող ընդերք , հարուստ գյուղ , Ռուսաստանի Ամերիկայի և Եվրոպայի հետ շատ լավ հարաբերություններ, որոնց կստիպեն հարգել հայ ժողովրդին: « Հիմա, մինչև ապրիլի 9-ը հարգեք հայ ժողովրդին, չգնաք կեղծիքի ու ստի ճանապարհով , չգնաք Նժդեհ մեջբերելով, սպարապետի կենացը խմելով , 30 արծաթի մասին խորաններով խոսելով, բայց կյանքի մեջ ծաղրելով Նժդեհին և ժողովրդին: Մի շաբաթ մնաց, խնդրում եմ, պահանջում եմ և ակնկալում եմ, միացեք մեր ազգային միասնությանը, որովհետև մեր դեմ խաղ չկա», առաջարկեց բանախոսը, որին ժողովուրդը երկար ծափահարեց:
Այդ պահին «Հա~ղթա~նա~կ »բացականչելով Րաֆֆուն մոտեցավ Ջաջուռի մի քաղաքացի` կոչ անելով ոստիկաններին չկրկնել մարտի 1-ի դեպքերը ու ճանաչել Րաֆֆու հաղթանակը:
Րաֆֆին կատակեց, թե «Ինձ թվում է Ջաջուռից նորմալ պատգամավորական թեկնածու կա»:Նա նաև հավելյալ նախազգուշացում արեց Գյումրիից. «Թող ոչ մեկը Արցախով սպեկուլյացիա չանի, որովհետև առաջին հերթին այս հավաքվածները` մեր ժողովուրդը , գիտի արյան գինը , գիտի հայ քաղաքացու իմաստը մեր հանրապետության համար, գիտի, որ յուրաքանչյուր կյանք մի ամբողջ հայրենիքի արժեքն ունի, և չենք զիջելու մեր կյանքերը ոչ թշնամուն, ոչ էլ խաղաղ պայմաններում: Դրա համար ամեն մեկը իր գործի մեջ, բայց հանկարծ ոչ մեկը չքարոզի հայ ժողովրդին, որ Արցախը վտանգի տակ է:Այո, Արցախը միշտ վտանգի տակ է, և զգուշացնում եմ Արցախի սպեցնազը, օմոնը` հատուկ նշանակության զորքերը , Օգանովսկիի ջոկատը հայտնի, թող իր գործի մեջ լինի Արցախի ներսում, հանկարծ քաղաքացիական մեր պայքարում թող հայ տղաները , մեր հարազատ զինվորները չմտցնեն, պահանջում եմ և զգուշացնում»:
Այնուհետ դարձյալ հիշեցրեց, որ ապրում ենք մեր կյանքի ամենապատասխանատու մեկ շաբաթը, շրջանը ` Նոր Հայաստանի կերտման շրջանն է սկսվում: «Ապրիլի 9-ից, ժամը 11-ից պարտավոր ենք միասին լինել ամբողջ ազգով` կուսակցական դրոշները խոնարհված , մեկ եռագույն դրոշակ , մեկ հանրապետություն, մեկ սահմանադրություն, միացյալ քաղաքացիներ և ազգ, և թող ոչ մեկը քարոզ չկարդա. որ 3 հազար է, թե մի հազար, մենք ունենք միլիոնավոր հաղթանակած ժողովուրդ` մեկ բռունցք դարձած, որ տանելու է դեպի ճանապարհը, դեպի հաղթանակ: Թող չկասկածեն և ժողովուրդը ոչխարի հոտի հետ չհամեմատեն , ոչ էլ սոված, անգիտակից անվանեն: Շատ գիտակից , իմաստուն, նվիրյալ ժողովուրդ է, որը այստեղ է իր կամքով , և ով կասկածում է, կտեսնի, եթե մինչև հիմա դժվարություն ունի էդ ճշմարտությունը ընկալելու», -ասաց Րաֆֆի Հովհաննիսյանը:
Նա նաև շեշտեց, որ Նժդեհը ժողովրդի մեջ է, հավատքը ևս ժողովրդի մեջ է, թող եկեղեցու խորանից չխոսեն սեփական ճշմարտություն պարտադրելու մասին: «Սեփական ճշմարտությունը ուզում են պարտադրել ժողովրդին նրանք, ովքեր գողացան, կեղծեցին փետրվարի 18-ին, իսկ մենք ասում ենք` դա հականժդեհական է, հակաազգային է , հակաքրիստոնեական է», -եզրափակեց «Ժառանգության» առաջնորդը :
Նունե ԱՐԵՎՇԱՏՅԱՆ
